સાઈનસને શા માટે ન કરવું નજરઅંદાજ?

સાઇનસ લાંબા ગાળે અસ્થમા કે તેના જેવા ગંભીર રોગોમાં પણ ફેરવાઈ શકે છે

તમારી આસપાસમાં તમને કોઇક ને કોઇને સાઇનસનો દર્દી જોવા તો મળશે જ. સાઇનસમાં લોકોને માથાનો દુ:ખાવો, શ્વાસ લેવામાં તકલીફ, નાકમાં ખંજવાળ જેવી અલગ અલગ સમસ્યાનો અનુભવ થાય છે. સામાન્ય શબ્દોમાં કહીએ તો સાઇનસ નાકનો રોગ છે. નાક બંધ થવું, માથાનો દુ:ખાવો, અડધા માથામાં તીવ્ર દુ:ખાવો, નાક વહેવું જેવાં લક્ષણો જોવાં મળે છે. તેનાથી હળવો તાવ આવે છે, આંખોમાં અથવા બંને બાજુની પાંપણો પર દુ:ખાવો થવો, તણાવ, ડિપ્રેશન તેમજ ચહેરા પર સોજો આવવો, નાક અને ગળામાં કફ જમા થવો જેવી તકલીફો પડી શકે છે. આ રોગથી પીડિત વ્યક્તિ ધૂળ અને ધુમાડો સહન કરી શકતી નથી. સાઇનસ લાંબા ગાળે અસ્થમા કે તેના જેવા ગંભીર રોગોમાં પણ ફેરવાઈ શકે છે.