ગુજરાતમાં હવે લીલા દુષ્કાળનું જોખમઃ આજે પણ દક્ષિણ ગુજરાત અને સૌરાષ્ટ્રમાં મેઘ પ્રકોપ

કેટલાક જાણીતા હવામાનશાસ્ત્રીઓએ દિવાળીના સપરમા દિવસોમાં પણ વરસાદ વિલન બતશે તેવી આગાહી કરી

ગુજરાત માટે એ બહુ જ ચોંકાવનારી વાત છે કે આસો મહિનો પણ હવે પૂરો થવા આવશે અને સામાન્ય રીતે આ દિવસોમાં વાતાવરણમાં ઠંડક પ્રસરતી હોય છે અને હવામાન આહ્લાદક બનીને શિયાળાના આગમનની ચાડી ખાય છે તેના બદલે કુદરત જાણે કે કોપાયમાન થઈ હોય તેમ અનેક વિસ્તારમાં અષાઢી માહોલ જામ્યો છે. નદી, નાળાં, તળાવ પાણીથી ઊભરાયાં છે. રસ્તા પર પાણી ફરી વળ્યાં છે અને ખાસ તો જગતનો તાત પોતાની ચાર મહિનાની મહેનત પર પાણી ફરી વળેલું જોઈને ચોંધાર આંસુએ રડી રહ્યો છે. ગુજરાતમાં તો અત્યારે લીલો દુષ્કાળ પડ્યો છે અને જે રીતે વરસાદની આગાહી સામે આવી રહી છે તેને જોતાં ખેડૂતોની દિવાળી ચોક્કસપણે બગડી ગઈ છે અને સામાન્ય લોકોને પણ આગામી દિવસોમાં કૃષિ પાકોની અછતથી મોંઘવારીની જ્વાળા વધુ દઝાડવાની છે.