યહ દિવાલી ‘રોશની' વાલી તહેવારોમાં બે લાખથી વધુ સ્ટ્રીટ લાઈટ ઝળહળતી રહેશે

મ્યુનિસિપલ લાઈટ વિભાગનો એવો દાવો છે કે માંડ એક કે બે ટકા ફોલ્ટ આ દિવસોમાં સર્જાઈ શકે છે

દિવાળી એટલે કે પ્રકાશોત્સવ. આ દિવસો દરમિયાન ઘરે ઘરે દીવડા મુકાશે. શહેરનાં પ્રવેશદ્વારોને આકર્ષક લાઇટિંગથી સજ્જ કરાશે. ઘરઆંગણે કે ઘરમાં વિવિધ પ્રકારની રંગબેરંગી રંગોળી પુરાશે અને આ તહેવારના દિવસોમાં સામાન્યમાં સામાન્ય નાગરિકનું ઘર શોભી ઊઠશે. સ્વાભાવિકપણે મ્યુનિસિપલ કોર્પોરેશન પણ દિવાળીના સપરમા દિવસોમાં લોકોને રોડ પર અંધારું ઉલેચવું ન પડે તે દિશામાં મક્કમ બન્યું છે. શહેરમાં આશરે ૨.૦૨ લાખથી વધુ સ્ટ્રીટ લાઇટ છે અને આવા સારા દિવસોમાં જો સ્ટ્રીટ લાઇટ બંધ હોય તો લોકોના ઘરે નૂતન વર્ષાભિનંદન ક૨વા નીકળેલા કે દેવદર્શને જનારા અમદાવાદીઓ ચોક્કસ મુશ્કેલીમાં મુકાઈ શકે તેમ છે, પરંતુ તંત્રએ એવી વાત ઉચ્ચારી છે કે દિવાળીના તહેવારોને ઝળહળતી સ્ટ્રીટ લાઇટ વચ્ચે આનંદભેર ઊજવી શકાશે.

આમ તો સામાન્ય દિવસોમાં છાશવારે એક અથવા બીજા સ્થળે બંધ સ્ટ્રીટ લાઇટની ફરિયાદો ઊઠતી રહે છે. ખાસ કરીને ઓવરબ્રિજ પરની સ્ટ્રીટ લાઇટ એક અથવા બીજા કારણસર બંધ પડતી જોવા મળી છે. આ બાબતે વારંવાર ચર્ચા પણ ઊઠે છે અને મ્યુનિસિપલ લાઇટ વિભાગ બંધ સ્ટ્રીટ લાઇટોને ફરી ચાલુ કરવા માટે દોડધામ કરે છે.