દક્ષિણ ભારતના તામિલતાડુ, પુડુચેરી અને કરાઈકલમાં ભારેથી અતિભારે વરસાદનું એલર્ટ

પહાડોમાં હિમવર્ષા બાદ મેદાની વિસ્તારોમાં ધુમ્મસ અને ઠંડી શરૂ

ડિસેમ્બર મહિનો શરૂ થવાને હવે ગણતરીના દિવસો જ બાકી છે ત્યારે ઉત્તર ભારતમાં તીવ્ર ઠંડી પડવા લાગી છે. પહાડી વિસ્તારોમાં હિમવર્ષા બાદ મેદાની વિસ્તારોમાં ધુમ્મસ અને ઠંડી શરૂ થઈ ગઈ છે. હવામાન વિભાગે આજે દક્ષિણ ભારતનાં કેટલાંક રાજ્યમાં ભારેથી અતિભારે વરસાદનું એલર્ટ જારી કર્યું છે, બીજી તરફ દિલ્હી, પંજાબ અને હરિયાણા સહિત પશ્ચિમ ઉત્તરપ્રદેશમાં ગાઢ ધુમ્મસની સંભાવના છે, જેના કારણે વિઝિબિલિટી ઘણી ઓછી થઈ જશે. ઉત્તર-પશ્ચિમના પવનોએ દિલ્હી તેમજ પંજાબ, હરિયાણા અને પશ્ચિમ ઉત્તરપ્રદેશમાં ધુમ્મસની ઘનતા વધી છે અને દિવસનું તાપમાન સતત ઘટી રહ્યું છે. ઉત્તરથી ફૂંકાતા પવનો આ ધુમ્મસને પૂર્વ ઉત્તરપ્રદેશ અને બિહાર સુધી લંબાવી શકે છે. હવામાન વિભાગ અનુસાર ઉત્તરપૂર્વનાં રાજ્યમાં વરસાદનો સમયગાળો ચાલુ રહેશે. આસામ, મેઘાલય, નાગાલેન્ડ, મણિપુર, મિઝોરમ અને ત્રિપુરામાં પવન અને વીજળી સાથે ભારે વરસાદની અપેક્ષા છે. ઉત્તર ભારતનાં રાજ્ય કરતાં દક્ષિણ ભારતનાં રાજ્યમાં ઠંડીની અસર ઓછી છે. છેલ્લા એક સપ્તાહથી તામિલનાડુ, પુડુચેરી અને કેરળમાં ભારે વરસાદ પડી રહ્યો છે.