રાધે-ટ્રોગન ગ્રૂપ અને સિરામિક ટાઈલ્સના ઉત્પાદકોને ત્યાં દરોડામાં ૫૦ લાખની રોકડ, એક કરોડનું ઝવેરાત પકડાયું

૫૦૦ કરોડના હિસાબી ગોટાળાના વધુ દસ્તાવેજો મળ્યાઃ બેન્ક લોકર સીલ કરાયાં, આજે બીજા દિવસે પણ દરોડાની કામગીરી ચાલુ, વધુ સાતથી ૧૦ સ્થળોએ તપાસ શરૂ કરાઈ

આવકવેરા વિભાગના અધિકારીઓએ ગઈ કાલે અમદાવાદ, મહેસાણા, રાધનપુર, ગાંધીનગર અને મોરબીમાં રાધે અને ટ્રોગન બિલ્ડર ગ્રૂપ તેમજ મોરબીમાં સિરામિક ટાઇલ્સના વ્યવસાયમાં સંકળાયેલા ગ્રૂપને ત્યાં ૧૫થી ૨૦ સ્થળોએ દરોડા પાડ્યા હતા અને આજે સતત બીજા દિવસે પણ દરોડાની કાર્યવાહી ચાલુ રાખવામાં આવી છે.

આજે વધુ દસ સ્થળોએ દરોડા પાડવામાં આવ્યા છે. પ્રાથમિક તપાસમાં જુદી જુદી જગ્યાએથી ૫૦ લાખની રોકડ રકમ અને એક કરોડનું ઝવેરાત જપ્ત કરવામાં આવ્યું છે. તેમ છતાં પણ હજુ વેલ્યુએશન ચાલુ હોવાથી રોકડ ૨કમ અને ઝવેરાતનો આંકડો ઊંચો જવાની શક્યતાઓ છે. પ્રાથમિક તપાસમાં આઈટી અધિકારીઓને રૂ. સો કરોડના હિસાબી ગોટાળા મળ્યા છે. તેમાં પણ બીજા દિવસે દરોડાની કાર્યવાહી ચાલુ રખાતાં અંદાજે ૫૦૦ કરોડથી વધારેના રોકાણ અંગેના દસ્તાવેજો જપ્ત કરવામાં આવ્યા છે. બિલ્ડરોએ રેસિડેન્શિયલ અને કોમર્શિયલ ઇમારતો ઊભી કરીને કરોડો રૂપિયાની કમાણી કરી છે અને રોકડેથી સ્વીકારેલી રકમ હિસાબી ચોપડે દર્શાવી નથી. અન્ય સહભાગી કંપનીઓમાં નાણાં ડાઈવર્ટ કર્યાં હોવાની હકીકતો પણ બહાર આવી છે.