அதிக சிங்கப்பூரர்களுக்கு உடன்பாடு: உள்துறை அமைச்சு

கடுமையான குற்றங்களுக்கு மரண தண்டனை விதிப்பது குறித்த கருத்தாய்வு

கொலை, அதிக அளவில் போதைப்பொருளைக் கடத்துதல், துப்பாக்கிச்சூடு போன்ற மிகக் கடுமையான குற்றங்களுக்கு மரண தண்டனை விதிப்பதை அதிகமான சிங்கப்பூர் குடியிருப்பாளர்கள் ஒப்புக்கொண்டுள்ளனர்.

உள்துறை அமைச்சு 2023ஆம் ஆண்டு நடத்திய கருத்தாய்வில் பங்கேற்றவர்களில் முக்கால்வாசிப்பேர் அல்லது 77.4 விழுக்காட்டினர், அதனைத் தாங்கள் உறுதியாக ஒப்புக்கொள்வதாக அல்லது ஒப்புக்கொள்வதாகக் கூறினர்.

இது 2021ல் மேற்கொள்ளப்பட்ட கருத்தாய்வில் இவ்வாறு கூறிய 73.7 விழுக்காட்டினருடன் ஒப்பிடப்பட்டது.

மரண தண்டனை மிகவும் கடுமையான குற்றங்களைத் தடுக்கிறது என்றும் இதுபோன்ற குற்றங்கள் கடுமையானவை, சமூகத்திற்கு ஆபத்தை ஏற்படுத்துகின்றன எனத் தாங்கள் உணர்வதாகவும் மரண தண்டனை குற்றத்துடன் ஒத்துப்போகிறது என்றும் கூறினர். வியாழக்கிழமை (செப்டம்பர் 19) கருத்தாய்வு முடிவுகளை வெளியிட்ட உள்துறை அமைச்சு இதனைக் கூறியது.