குடும்ப வன்முறை: மாதர் சாசனத்தில் முக்கியத் திருத்தங்கள்

குடும்ப வன்முறையால் பாதிக்கப்பட்டவர்களுக்கு மேம்பட்ட ஆதரவையும் பாதுகாப்பையும் வழங்குவதை உறுதிசெய்ய சாசனத்தில் புதிய திருத்தங்கள் மாதர் ஜனவரி 2025ல் நடைமுறைக்கு வரவுள்ளதாக உள்துறை மற்றும் சமுதாய, குடும்ப மேம்பாட்டு துணை அமைச்சர் சுன் ஷுவெ லிங் தெரிவித்துள்ளார்.

- இளவரசி ஸ்டீஃபன்

குடும்ப வன்முறை அவசரகாலச் செயற்குழுவின் (DVERT) பங்காளிகளைப் பாராட்டும் நிகழ்வு திங்கட்கிழமை (நவம்பர் 18) நடைபெற்றது. அந்நிகழ்வில் சிறப்புரையாற்றிய திருவாட்டி சுன், குடும்ப வன்முறை அவசரகாலச் செயற்குழுவின் நடவடிக்கைகளுக்கு மேலும் வலுசேர்க்கும் வகையில் வரும் ஆண்டு முதல் நடைமுறைக்கு வரவுள்ள புதிய திருத்தங்கள் குறித்த அறிவிப்புகளை வெளியிட்டார்.

மாதர் சாசனத்தில் வரவுள்ள திருத்தங்கள்

ஜனவரி 2025ல் அமலுக்கு வரவுள்ள மாதர் சாசனத் திருத்தம், ‘அவசரகால ஆணை' எனும் அம்சத்தை அறிமுகப்படுத்தவுள்ளது.

இதன்படி, குடும்ப வன்முறை அவசரகாலச் செயற்குழு அதிகாரிகள், அவசரகால ஆணையைப் பிறப்பிக்கவோ சம்பவ இடத்தில் அத்தகைய ஆணைகளை அதிகாரமுள்ள நபர்கள் பிறப்பிக்க கட்டளையிடவோ முடியும்.