12 மணி நேரத்துக்குப் பிறகு தண்ணீர் விநியோகம் சீரானது

கிளமெண்டி வட்டாரத்தைச் சேர்ந்த ஏறக்குறைய 70 வீடுகளுக்கும் வர்த்தகங்களுக்கும் 12 மணி நேரத்துக்குமேல் தடைபட்டிருந்த தண்ணீர் விநியோகம் வழக்க நிலைக்குத் திரும்பியுள்ளது.

முன்னதாக, கட்டுமானத் தளம் ஒன்றில் தண்ணீர்க் குழாய் வெடித்ததை அடுத்து அந்த வட்டாரத்தில் தண்ணீர் வெள்ளம்போல் சூழ்ந்தது.

புளோக் 324 கிளமெண்டி அவென்யூ 5க்கு அருகில் நடந்த இச்சம்பவம் குறித்துப் பொதுப் பயனீட்டுக் கழகம், நவம்பர் 25ஆம் தேதி அதிகாலை 1.30 மணியளவில் ஃபேஸ்புக்கில் பதிவிட்டது.

150 மில்லிமீட்டர் விட்டம் கொண்ட அந்தத் தண்ணீர்க் குழாய் வெடித்ததை அடுத்து, புளோக்குகள் 324, 325ஐச் சேர்ந்த வீடுகளுக்கும் புளோக் 325ன் கீழ்த்தளத்தில் செயல்பட்ட வர்த்தகங்களுக்கும் தண்ணீர் விநியோகம் தடைபட்டதாகக் கழகம் கூறியது.