எளிமையான மனிதரின் கதையாக உருவாகி உள்ள திரைப்படம் 'திரு.மாணிக்கம்’

சமுத்திரக்கனி கதையின் நாயகனாக நடித்துள்ள படத்தை இயக்கியுள்ளார் நந்தா பெரியசாமி. இவர் ஏற்கெனவே ‘மாத்தி யோசி’, ‘ஆனந்தம் விளையாடும் வீடு’ ஆகிய படங்களை இயக்கியவர்.

இந்நிலையில், மின்னிலக்க உலகத்தில் நேர்மையாக வாழ முடியுமா என்ற கேள்வியை அலசும்விதமாக ‘திரு.மாணிக்கம்’ படத்தை இயக்கி உள்ளதாகச் சொல்கிறார்.

“நேர்மைக்கும் மனசாட்சிக்கும் எளிய மனிதர்கள்தான் பயப்படுவார்கள். அவர்களைப் போல் மற்றவர்கள் அஞ்சுவதில்லை.

“இன்று எல்லாமே ‘கார்பரேட்’ மயமாகி வியாபாரமாகிவிட்டது. அப்படி எந்தவித மனிதாபிமானமும் இல்லாமல் வாழும் மனிதர்களுக்கு இடையே வாழும் ஓர் எளிய மனிதனைப் பற்றிய கதை இது.

“இந்தப் படத்தில் நாயகன் திரு.மாணிக்கம் நேர்மையை மட்டுமே வலியுறுத்துவார். அதைக்கேட்டு எல்லோரும் மாணிக்கமாக வாழ ஆசைப்பட்டால் அதுதான் இந்தப் படத்தின் வெற்றியாக இருக்கும்,” என்கிறார் இயக்குநர் நந்தா பெரியசாமி.