సమస్యల గూళ్లు..చదువు లోగిళ్లు!

ఎవరు ఒప్పుకున్నా, ఒప్పుకోకపోయినా మన దేశంలోని ఉన్నత విద్యాసంస్థలు రాజకీయాలతో నిండిపోయాయని చెప్పక తప్పదు.

- ఈదర శ్రీనివాసరెడ్డి

ఎవరు ఒప్పుకున్నా, ఒప్పుకోకపోయినా మన దేశంలోని ఉన్నత విద్యాసంస్థలు రాజకీయాలతో నిండిపోయాయని చెప్పక తప్పదు. దీనిని కొంతమంది ఖండించవచ్చు. ఉన్నత విద్యావంతులు రాజకీయాలలో పాల్గొనకూడదా? అని ప్రశ్నించనూవచ్చు.

ఆ మాటకొస్తే మన దేశంలోని ఎంతోమంది ఉన్నత చదువులు చదువుతున్నప్పుడే రాజకీయంగా పార్టీల అనుబంధ సంస్థల నేతలుగా ఎదిగి ఆ తరువాత ప్రత్యక్ష రాజకీయాలలో పాల్గొని మంత్రులు, ముఖ్యమంత్రులు అయినావారే. ఆ మాట అటు వుంచితే, ఇప్పుడు ప్రభుత్వ ఆధీనంలో నడుస్తున్న ఉన్నత విద్యాసంస్థలన్నీ రాజకీయ మురుగుతో నిండి తమ అస్థిత్వాన్ని నిలబెట్టుకోలేక కొట్టుమిట్టాడుతున్నాయి.

మన దేశంలో అసలు విద్యాసంస్థల స్థాపన దగ్గర నుంచే రాజకీయాలు మొదలవుతాయి. మంత్రులు, ముఖ్యమంత్రులు తమ స్వస్థలంలోనో లేకపోతే తమ నియోజక వర్గంలోనో కొత్త విద్యాసంస్థలు స్థాపించాలని యోచిస్తారు. దీనివల్ల ఆ ప్రాంతం అభివృద్ధి చెందటమే కాక రాజకీయంగా తమకు మేలు జరుగుతుందని వారి ఆలోచన. నిజానికి ఉన్నత విద్యాసంస్థలు మారుమూల అభివృద్ధి చెందని ప్రదేశాల్లో స్థాపిస్తే, ఆ ప్రాంతం అభివృద్ధి చెందుతుంది. కానీ ఇందుకు విరుద్ధంగా ఇవి స్థాపించబడుతున్నాయి. చివరికి గిరిజన విశ్వవిద్యాలయాలు సైతం ఆ ఆ ప్రాంతాల్లో స్థాపించబడటం లేదు. అదే విధంగా అధికార పక్షం ఏలుబడిలో ఉన్న రాష్ట్రాలలో ఎక్కువ విద్యాసంస్థలు స్థాపించబడటం, విపక్షాల పాలనలోని రాష్ట్రాలకు మొండిచెయ్యి చూపటం పరిపాటిగా మారింది. ముఖ్యంగా వైద్య కళాశాలల స్థాపనలో ఈ వివక్షత స్పష్టంగా కనపడుతోంది. దీనివల్ల సామాన్య ప్రజలకు వైద్యసేవలు అందుబాటులో లేకుండా పోతున్నాయి.