మట్టే ఔషధం

దేవేంద్ర సభలో ఆ రోజున మహావిష్ణువు, దేవగురువు బృహస్పతి వున్నారు. స్వామివారు అసురులను వధించి మమ్మల్ని అమరావతిని పాలించేలా అనుగ్రహించారు.

- డా॥ పులివర్తి కృష్ణమూర్తి

తమ కృప, కటాక్షం, శక్తీ మాకు ఎల్లప్పుడూ ఉండాలి.. అంటూ దేవేంద్రుడు విన్నవించగానే

నారాయణుడు “దేవేంద్రా, ఇక నువ్వు అసుర భయాన్ని వీడి సమర్థవంతంగా పరిపాలన చేయి. నేను వెళ్లిస్తాను" అని బయలుదేరాడు.

ఇంద్రాదులు మహావిష్ణువును సాగనంపారు. ఇంద్రుడు బృహస్పతితో మనం దేవాసుర సంగ్రామంలో గెలిచాం. కానీ ఇదిగో.. ఈ దేవతలను చూడండి. అసురులతో జరిగిన యుద్ధంలో వీరికి గాయాలై ఎంతటి బాధను అనుభవిస్తున్నారో!” అనగానే అక్కడున్న వారందరూ కూడా అలాగే చెప్పుకొచ్చారు.

"బాధపడకండి. మీరంతా భూలోకానికి వెళ్లండి. కృపా సముద్రుడైన ఆ పరమేశ్వరుణ్ణి ఆరాధించండి.ఆయన బాధలను తప్పక పోగొడతాడు" అని బృహస్పతి చెప్పాడు. వారిని దక్షిణ దేశంలోని వైదీశ్వరాలయానికి వెళ్లమన్నాడు.

“అలాగేనని” అందరూ వైదీశ్వరస్వామి ఆలయానికి వెళ్లి, ఆ స్వామిని ఆరాధించారు.