നെറ്റിപ്പട്ടം

മുപ്പത്തിമുക്കോടി ദേവതകളെ ഉൾക്കൊള്ളുന്ന ഒരു മഹാക്ഷേത്രം

- ജി. കൃഷ്ണൻ

ക്ഷേത്രങ്ങളിലെ ഉത്സവങ്ങൾ ഉൾപ്പെടെ പല ആഘോഷങ്ങൾക്കും നെറ്റിപ്പട്ടം കെട്ടിയ ഗജവീരന്മാരുടെ സാന്നിദ്ധ്യവും പകിട്ടും ഇന്ന് കൂടിവരികയാണ്. നെറ്റിപ്പട്ടം കേവലം ഒരു അലങ്കാര വസ്തു മാത്രമല്ലാതായിരിക്കുന്നു ഇന്ന്. ആനകളുടെ നെറ്റിയിലേക്ക് നെറ്റിപ്പട്ടം കെട്ടുന്നതോടുകൂടി ഗജവീരന്മാരുടെ മട്ടും ഭാവവും മാറുകയാണ്.

നെറ്റിപ്പട്ടം ഇന്ന് മിക്കവാറും വീടുകളിലെ സ്വീകരണമുറികളിൽ പ്രൗഢിയോടെ സ്ഥാനം പിടിച്ചിരിക്കുന്നു. ഒരു പ്രത്യേക ചൈതന്യവും പൊൻതിളക്കവും ഒക്കെ കൈവരികയാണപ്പോൾ.

നെറ്റിപ്പട്ടത്തിനൊരു പാരമ്പര്യമുണ്ട്. മുപ്പത്തിമുക്കോടി ദേവതകളെ ഉൾക്കൊള്ളുന്ന ഒരു മഹാ ക്ഷേത്രമാണിത്. നെറ്റിപ്പട്ടത്തിൽ കാണുന്ന സ്വർണ്ണം ചാർത്തിയ ഓരോ ഗോളങ്ങളെയും ചിഹ്നങ്ങളെയും പ്രതിനിധാനം ചെയ്തിരിക്കുന്നത് ഓരോ ദൈവസങ്കൽപ്പങ്ങളായിട്ടാണ്.