പ്രപഞ്ചശക്തിയുടെ ബുദ്ധിപ്രഭാവം

ദേവി ബുദ്ധിയാണ്, ജീവനകലയാണ്, സദ്ബുദ്ധിക്കായി നാമേവർക്കും ദേവിയോട് പ്രാർത്ഥിക്കാം.

- നാരായണൻ പോറ്റി

വിദ്യാദേവിയുടെ അദൃശ്യസാന്നിധ്യം ഭൂമിയിലാകെ നിറഞ്ഞുനിൽക്കുന്ന കാലഘട്ടമാണ് നവരാത്രി. നവരാത്രി കന്നിമാസത്തിലാണ് നാം ആചരിക്കുന്നത്. എന്നാൽ മിഥുനം, മീനം, മകരം എന്നീ മാസങ്ങളിലും സരസ്വതീ സാന്നിധ്യമുണ്ടെന്ന് കരുതുന്ന നവരാത്രി ആചാരം പതിവുണ്ട്. മകരത്തിലെ നവരാത്രിയെ വസന്ത നവരാത്രി എന്നാണ് അറിയപ്പെടുന്നത്. എന്നാൽ കന്നിമാസത്തിലെ നവരാത്രിയാണ് ഏറെ പ്രാധാന്യത്തോടെ ആചരിച്ചുവരുന്നത്. നവരാത്രികാലം വ്രതാചരണത്തിന്റെ ഭാഗം കൂടിയാണ്. പ്രത്യേകിച്ച് വിദ്യാർത്ഥികൾ നവരാത്രി വ്രതമായിത്തന്നെ ആചരിക്കണം എന്നാണ് നിബന്ധന. വിദ്യാതടസ്സങ്ങൾ നീങ്ങാൻ നവരാത്രിവ്രതം ആചരിക്കുന്നത് ഉത്തമമായിത്തന്നെ വിശ്വസിച്ചുപോരുന്നു.

മറ്റ് വ്രതങ്ങൾ പോലെ അധികഠിനമായ വ്രതമല്ല നവരാത്രി വ്രതം. സസ്യാഹാരം മാത്രം കഴിക്കുക എന്നതാണ് ആഹാര കാര്യത്തിലെ നിഷ്ക്കർഷത. എന്നാൽ ഒരു നേരം അരിയാഹാരവും മറ്റ് നേരങ്ങളിൽ ഗോതമ്പ്, പഴം എന്നിവ കഴിച്ച് നവരാത്രി ഒരിക്കലായി ആചരിക്കുന്ന പതിവുണ്ട്. നവരാത്രികാലം വ്രതകാലമായിട്ടാണ്(ശബരിമല വ്രതംപോലെ) പൊതുവേ ആചരിച്ചുകാണുന്നത്. ഒൻപതുദിവസം ആചരിക്കാൻ കഴിയാത്തവർക്ക്, ഏഴ്, അഞ്ച്, മൂന്ന് എന്ന രീതിയിലും മഹാനവമി നാളിൽ മാത്രമായിട്ടും വ്രതം ആചരിക്കാം. നവരാത്രി വ്രതത്തിന്റെ പ്രധാന ആചാരരീതി രാവിലെ എഴുന്നേറ്റ് കുളികഴിഞ്ഞ് ദുർഗ്ഗാദേവിയെ ഭജിക്കുക എന്നതാണ്. ദേവിയുടെ ദ്വാദശാക്ഷരി മന്ത്രം നൂറ്റിയെട്ട്പ്രാവശ്യമെങ്കിലും ജപിക്കണം എന്നാണ് ശാസ്ത്രം. ദുർഗ്ഗാ ദേവീം ശരണമഹം പ്രപദ്യേ.' എന്നതാണ് മന്ത്രം. മനഃശാതിക്കും ജീവിതവിജയത്തിനും ദ്വാദശാക്ഷരിമന്ത്രം നിത്യം ജപിക്കുന്നതും ഉത്തമമാണ്. രാവിലെ എന്നതുപോലെ വൈകുന്നേരവും ദുർഗ്ഗാദേവി മന്ത്രം ജപിക്കുന്നത് ഉത്തമം തന്നെയാണ്.