കുഞ്ഞു വൈകിയാൽ അസ്വസ്ഥമാകേണ്ടതില്ല

ശരിയായ രീതിയിൽ ശാരീരികബന്ധത്തിലേർപ്പെടാതെ വന്ധ്യതാ ചികിത്സയ്ക്ക് പോകുന്നവരുടെ എണ്ണം വളരെ കൂടുതലാണിന്ന്. കുഞ്ഞു പിറക്കാൻ കാത്തിരിക്കുന്നവർക്ക് ചില നിർദേശങ്ങൾ..

- ഷിനില മാത്തോട്ടത്തിൽ

കുഞ്ഞു പിറക്കാനുള്ള കാത്തിരിപിന് ചിലപ്പോൾ നീളം കൂ ടും. അതിൽ അസ്വസ്ഥമാവരുത്. കുഞ്ഞിനുവേണ്ടി മാനസികമായി തയ്യാറെടുത്ത് കുറച്ചു മാസങ്ങൾക്കകം തന്നെ ഗർഭംധരിച്ചുകളയാമെന്ന് പ്രതീക്ഷിക്കുന്നവരാണ് ഏറെയും. എന്നാൽ, ഒന്നോ രണ്ടോ മാസംകൊണ്ട് ഗർഭിണിയാവുന്നില്ലെന്ന് കരുതി ആശങ്കപ്പെട്ട് ഉടൻ തന്നെ ഓടിപ്പോയി ഡോക്ടറെ കാണേണ്ട കാര്യമൊന്നുമില്ല. ദമ്പതിമാർക്ക് ആരോഗ്യപ്രശ്നങ്ങളൊന്നുമില്ലെങ്കിൽ പോലും 90 ശതമാനം പേരും ഒരു വർഷമെങ്കിലും എടുക്കും ഗർഭം ധരിക്കാൻ. ഒന്നിച്ച് ആത്മവിശ്വാസത്തോടെയും സന്തോഷത്തോടെയും ജീവിക്കുക. ശരിയായ രീതിയിൽ ലൈംഗികബന്ധത്തിലേർപ്പെടുക. ഒരു കൊല്ലമൊക്കെ കാത്തിരിക്കാം. എന്നിട്ടും ഫലം കണ്ടില്ലെങ്കിലേ ഡോക്ടറെ കാണുന്നതിനെക്കുറിച്ച് ആലോചിക്കേണ്ടതുള്ളൂ. കുട്ടികളായില്ലേ എന്നന്വേഷിച്ച് സമ്മർദവും അസ്വസ്ഥതയും തരുന്ന ബന്ധുക്കളെ ഈ വിഷയത്തിൽ നിന്ന് തത്ക്കാലത്തേക്ക് അകറ്റിനിർത്താം. അസ്വസ്ഥമനസ്സോടെയുള്ള ലൈംഗിക ബന്ധം യാന്ത്രികമായിപ്പോവുമെന്നും കുട്ടികളുണ്ടാകാനുള്ള സാധ്യത കുറയ് ക്കുമെന്നും ഓർമവേണം. കുഞ്ഞുങ്ങ ളെ ആഗ്രഹിക്കുന്നവർക്കു മുമ്പിൽ പലവിധ പോംവഴികളുള്ള കാലമാണിത്. ശാരീരികമായ ബുദ്ധിമുട്ടുകളെ പരമാവധി മറികടക്കാൻ ആധുനിക ചികിത്സാരീതികളുണ്ട്. ചികിത്സയില്ലാതെത്തന്നെ ദീർഘകാല കാത്തിരിപ്പിനുശേഷം കുഞ്ഞുണ്ടാവുന്നവരുമുണ്ട്.

വന്ധ്യത മാത്രമല്ല കുഞ്ഞുണ്ടാവാത്തതിന് കാരണം

ഇന്ന് കുഞ്ഞുങ്ങളുണ്ടാവാത്തതിന്റെ പേരിൽ ആശുപത്രിയിലെത്തുന്ന ബഹുഭൂരിപക്ഷമാളുകളുടെയും പ്രശ്നം പ്രത്യുത്പാദനശേഷി ഇല്ലാ അതല്ല. കുഞ്ഞുണ്ടാവാൻ തിരഞ്ഞെടുക്കുന്ന പ്രായമാണ്. ഒട്ടുമിക്ക കേസിലും വിവാഹം വളരെ വൈകിയാണ് നടക്കുന്നത്. ജോലിയുടെ സമ്മർദമടക്കമുള്ള കാരണങ്ങളാൽ കുഞ്ഞുണ്ടാവുന്നത് പിന്നെയും നീളും. പ്രായം കൂടുന്തോറും പ്രത്യുത്പാദനശേഷി കുറയാനും അണ്ഡത്തിന്റെ ഗുണമേന്മ കുറയാനും സാധ്യതയുണ്ടെന്ന കാര്യം മനസ്സിൽ വെക്കുക.

ഇക്കാര്യങ്ങൾ ശ്രദ്ധിക്കുക

പ്രായം: സ്ത്രീക്ക് 30-ഉം പുരുഷന് 45-ഉം വയസ്സിൽ താഴെയാണ് പ്രായമെങ്കിൽ ഒരുവർഷം സ്വാഭാവികമായ ഗർഭധാരണത്തിനായി കാത്തിരിക്കാം. സ്ത്രീക്ക് 30 വയസ്സിനു മുകളിലാണെങ്കിൽ ആറുമാസം വരെയും. ഈ കാലയളവിൽ ഭർത്താവും ഭാര്യയും മാറിനിൽക്കുന്ന സാഹചര്യങ്ങൾ പരമാവധി കുറയ്ക്കുക. മാനസികമായി നല്ല അവസ്ഥയിലായിരിക്കാൻ ശ്രദ്ധിക്കാം.