കരുതലുണ്ട് അമ്മയ്ക്കും കുഞ്ഞിനും

അമ്മയുടെയും കുഞ്ഞിന്റെയും ആരോഗ്യസംരക്ഷണത്തിനുള്ള സൗജന്യ ചികിത്സാ പദ്ധതികളും ധനസഹായങ്ങളും പ്രയോജനപ്പെടുത്താം

-  സി.കരുണാകരൻ

പ്രസവം ഇങ്ങടുത്തു വരികയല്ലേ. ചെലവിനുള്ള കാശ് കരുതണ്ടേ?'' പ്രസവമടുത്ത സ്ത്രീകളുള്ള വീട്ടിലൊക്കെ കേൾക്കാറുള്ളതാണിത്. പ്രസവ തീയതി അടുത്തെത്തിയാൽ പിന്നെ ചെലവിനുള്ള പണം കണ്ടെത്തുക എന്നത് പലർക്കും പ്രയാസമുള്ള കാര്യമാണ്. അതിനേക്കാൾ പ്രധാനമാണ് അമ്മയുടെയും ജനിക്കുന്ന കുഞ്ഞിന്റെയും ആരോഗ്യം. പണ്ടുകാലങ്ങളിൽ വേണ്ട സമയത്ത് വൈദ്യസഹായമോ ചികിത്സയോ കിട്ടാതെ ഗർഭിണികൾ മരിക്കുന്നത് നമ്മുടെ നാട്ടിൽ നിത്യസംഭവമായിരുന്നു. അമ്മമാരുടെ മാത്രമല്ല, ജനിച്ച കുഞ്ഞുങ്ങളുടെ ജീവനും പലപ്പോഴും രക്ഷിക്കാനാവാറില്ല. പ്രസവത്തോടനുബന്ധിച്ചുള്ള മാതൃ, ശിശു മരണനിരക്ക് ഇക്കാലത്തിനിടെ ഏറെ കുറച്ചുകൊണ്ടുവരാൻ കഴിഞ്ഞിട്ടുണ്ട്. പക്ഷെ, ഇക്കാര്യത്തിൽ ഇനിയും മുന്നേറേണ്ടതുണ്ട്.

പണമോ വൈദ്യസഹായമോ ഇല്ലാത്തതിന്റെ പേരിൽ ഒരു ഗർഭിണിയും ബുദ്ധിമുട്ടാൻ പാടില്ലെന്നുള്ള ലക്ഷ്യത്തോടെ പല പദ്ധതികളും നമ്മുടെ രാജ്യത്ത് നടപ്പാക്കിയിട്ടുണ്ട്. ഇപ്പോൾ നിലവിലുള്ള പദ്ധതികളെ കുറിച്ചും അതിലൂടെ ലഭിക്കുന്ന സഹായങ്ങളെ കുറിച്ചും മനസ്സിലാക്കാം.

പ്രധാനമന്ത്രി മാതൃവന്ദന യോജന

ഗർഭിണികളായ സ്ത്രീകളുടെയും മുലയൂട്ടുന്ന അമ്മമാരുടെയും പോഷണ നിലവാരം ഉയർത്തുക, ആ രോഗ്യ പരിരക്ഷ ഉറപ്പാക്കുക എന്നീ ലക്ഷ്യങ്ങളോടെ നടപ്പാക്കുന്ന പദ്ധതിയാണ് പ്രധാനമന്ത്രി മാതൃവന്ദന യോജന (പി.എം.എം.വൈ.വൈ). വനിത, ശിശു വികസന വകുപ്പ് വഴി നടപ്പിലാക്കിവരുന്ന ഈ കേന്ദ്രാവിഷ്കൃത പദ്ധതി 2017 ജനുവരി ഒന്നിനാണ് ആരംഭിച്ചത്.

സഹായങ്ങളും വ്യവസ്ഥകളും