തലപ്പത്തെ തിളക്കം

കല്യാൺ സിൽക്സിന്റെ ചുവടുപിടിച്ച് അഞ്ചുകൊല്ലം മുമ്പ് തുറന്ന കല്യാൺ ഹൈപ്പർമാർക്കറ്റ് ശൃംഖല വിജയക്കൊടി നാട്ടിക്ക ഴിഞ്ഞു. നിറവാർന്ന നേട്ടത്തിൽ ടി.എസ്. പട്ടാഭിരാമനും ഹൈപ്പർമാർക്കറ്റിനെ നയിക്കുന്ന മരുമക്കൾ വർധിനിയും മധുമതിയും വിശേഷങ്ങൾ പങ്കുവെക്കുന്നു

- ഷിനില മാത്തോട്ടത്തിൽ

 ഉച്ചയൂണു കഴിഞ്ഞുള്ള ഇത്തിരി നേരം. ഫോണിലെ തിരക്കുവിളികൾക്ക് ഇടവേള കൊടുത്ത് ടി.എസ്. പട്ടാഭിരാമന്റെ കുടുംബം വർത്തമാനങ്ങളിൽ മുഴുകും. ബിസിനസും വീട്ടുകാര്യങ്ങളുമായി ചർച്ചകൾക്ക് ചൂടുപിടിക്കുന്ന നേരമാണത്. ഈ കുടുംബചർച്ചകളിൽ പരുവപ്പെട്ട ആശയങ്ങളിൽ കരുപ്പിടിച്ചാണ് മലയാളിയും കല്യാണും ഇത്രമേൽ ഇഴയടുത്തത്. അച്ഛന്റെ വഴിയേ മക്കൾ പ്രകാശ് പട്ടാഭിരാമനും മഹേഷ് പട്ടാഭിരാമനും ബിസിനസിന്റെ മർമങ്ങളറിഞ്ഞ് കരുത്താർജ്ജിച്ചതിവിടെ. ഇപ്പോൾ മരുമക്കൾ വർധിനി പ്രകാശും മധുമതി മഹേഷും.

കല്യാൺ ഹൈപ്പർമാർക്കറ്റ് ശൃംഖലയുടെ ചുമതലയേൽക്കുമ്പോൾ പട്ടാഭിരാമന് മരുമക്കളോട് ഒന്നേ പറയാനുണ്ടായിരുന്നുള്ളൂ. ഉത്പന്നങ്ങളുടെ ഗുണമേന്മയിൽ വിട്ടുവീഴ്ചയരുത്. ഇക്കാലമത്രയും കുടുംബം ബിസിനസിലുറപ്പാക്കിവന്ന വിശ്വാസ്യത ഹൃദയം കൊണ്ടറിഞ്ഞവരോട് അതൊന്നും പ്രത്യേകം പറയേണ്ട. എങ്കിലും അദ്ദേഹമതൊരു ഉപദേശമായി നൽകി. കല്യാണിന്റെ ഒരു സംരംഭത്തിന് നേതൃത്വം വഹിക്കുന്ന ആദ്യവനിതകളാണ് വർധിനിയും മധുമതിയും. മരുമക്കളെ ചുമതലയേൽപ്പിച്ചതിന്റെ വിശേഷങ്ങൾ പട്ടാഭിരാമൻ പറഞ്ഞുതുടങ്ങി.