സിനിമയുടെ കാമുകൻ

മലയാളിയുടെ പ്രണയത്തിന്റെ ഗൃഹാതുരമുഖമാണ് ശങ്കർ താരപ്പകിട്ടിൽ നിന്ന് മാറിനിന്ന കാലത്തും സിനിമയ്ക്കൊപ്പം സഞ്ചരിച്ച നായകൻ, മികച്ച വേഷങ്ങൾക്കായുള്ള കാത്തിരിപ്പും പ്രതീക്ഷകളും പങ്കുവെക്കുന്നു

- ആമി അശ്വതി

ഒരുകാലത്ത് മലയാളിയുടെ പ്രണയത്തിന്റെ പേരായിരുന്നു, പ്രണയനായകനായി വെള്ളിത്തിരയിൽ ഇത്രമേൽ തകർത്താടിയ മറ്റൊരു നടനില്ല. മലയാളത്തിലെ ആദ്യകാല സൂപ്പർസ്റ്റാറുകളിലൊരാളുടെ കരിയറിൽ ഗുണവും ദോഷവുമായത് അതേ പരിവേഷം തന്നെയായിരുന്നു. ശങ്കർ-മേനക ജോഡിയും മഞ്ഞിൽ വിരിഞ്ഞ പൂക്കൾ', 'എന്റെ മോഹങ്ങൾ പൂവണിഞ്ഞു തുടങ്ങി ഒട്ടനവധി മനോഹര പ്രണയചിത്രങ്ങളും ഗാനങ്ങളുമൊക്കെ ഇന്നും നമ്മുടെ മനസ്സിലുണ്ട്. കാലത്തിനും കവർന്നെടുക്കാൻ പറ്റാത്ത സുഖമുള്ള ഓർമകളായി... എന്നാൽ താരപദവിയുടെ ഗൃഹാതുരസ്മരണകളിൽ ഒതുങ്ങി നിൽക്കുന്നില്ല ശങ്കർ. എവിടെയായിരുന്നു എന്ന ചോദ്യത്തിന് പോലും പ്രസക്തിയില്ലാതെ ഇക്കാലമത്രയും സിനിമയ്ക്കൊപ്പം തന്നെയുണ്ടായിരുന്നു താനെന്ന് ഉറപ്പിക്കുന്നു അദ്ദേഹം. ഒറ്റപ്പാലത്തെ തറവാട്ടുവീട്ടിലിരുന്ന് തന്റെ പുതിയ സിനിമകളെപ്പറ്റി, പ്രതീക്ഷകളെയും പദ്ധതികളെയും പറ്റി ശങ്കർ സംസാരിക്കുന്നു.

എല്ലാ വർഷവും താങ്കളുടെ സിനിമകൾ വരുന്നുണ്ട്. എന്നിട്ടും പ്രേക്ഷകർ ചോദിക്കുന്നത് ശങ്കർ എവിടെ എന്നാണ്?

ഇപ്പോൾ യു.കെ. യിൽ സ്ഥിരതാമസമാണ്. പക്ഷേ, ജോലിയുമായി ബന്ധപ്പെട്ട് ഇവിടെ വന്നുപോകുന്നുണ്ട്. ഒറ്റപ്പാലത്ത് അച്ഛന്റെ വീടാണ്. അമ്മയുടേത് തൃശ്ശൂരും. 2000-ൽ ആണ് ചെന്നൈയിൽ നിന്നും കൊച്ചിയിലേക്ക് താമസം മാറ്റിയത്. ഇവിടെയാണ് മിക്കവാറും ഉണ്ടാവുക. പിന്നെ യാത്രകളും. വരുന്ന സിനിമകളിൽ എനിക്ക് എന്തെങ്കിലും പ്രാധാന്യം ഇല്ലെങ്കിൽ ചെയ്യാൻ ബുദ്ധിമുട്ടാണ്. ഇതിന് മുൻപ് ചെയ്ത, "ഭ്രമം ആയാലും വിശ്വാസം അതല്ലേ എല്ലാം ആയാലും നല്ല വേഷങ്ങളായിരുന്നു. ഒരു മുൻകാല നടൻ ആയാണ് "ഭ്രമത്തിൽ അഭിനയിച്ചത്. എന്റെ പഴയ പാട്ടുകളൊക്കെ കാണിച്ച് ആ കഥാപാത്രത്തിന് ഒരു പൊലിമ കൊടുത്തിരുന്നു. തമിഴിൽ ഒരു സിനിമ സംവിധാനം ചെയ്തു, "മണലനഗരം'. ലണ്ടനിൽ പൂർണമായും ചിത്രീകരിക്കുന്ന ഒരു ഹൊറർ ചിത്രം സംവിധാനം ചെയ്യുന്നതിനുള്ള ഒരുക്കങ്ങൾ ഏതാണ്ട് പൂർത്തിയായിരുന്നു. ആ സമയത്താണ് പ്രളയവും പിന്നെ കോവിഡും വരുന്നത്. അതോടെ ആ പ്രോജക്ട് മാറ്റിവെക്കേണ്ടി വന്നു. അടുത്ത വർഷം അതിന്റെ ജോലി തുടങ്ങാനാണ് പ്ലാൻ. എന്നാൽ ഒരു പ്രോപ്പർ മൂവി ... അത് വരാനാണ് ഞാൻ കാത്തിരിക്കുന്നത്.

കരിയറിൽ കൂടുതൽ ശ്രദ്ധിക്കാമായിരുന്നു എന്നു തോന്നിയിട്ടുണ്ടോ?