കണ്ണീരുണങ്ങാത്ത വീട്

 വിസ്മയയുടെ സഹോദരൻ വിജിത്ത് നൈജീരിയയിൽ തടവിലാണ്. മകളുടെ വേർപാടിന്റെ വേദന മാറും മുമ്പേ മകന്റെ ദുരവസ്ഥ... കണ്ണീർക്കടലിൽ കുടുംബം 

- അനിൽ മുകുന്നേരി

തെങ്ങോലകളുടെ തണലാണ് സീവിലയ്ക്ക് ചുറ്റും. മനസ്സുഖമേകുന്ന അന്തരീക്ഷം. പക്ഷേ, ഈ വീട്ടിൽ കണ്ണീര് തോരുന്നില്ല. വിസ്മയയുടെ വേർപാടിൽ തുടങ്ങിയ കണ്ണീർമഴ സ്ത്രീധന പീഡനത്തെ തുടർന്ന് ജീവനൊടുക്കിയ വിസ്മയയെ ഓർമയില്ലേ. അവളുടെ ഓർമകൾ നിറഞ്ഞ വീട്ടിൽ അച്ഛനമ്മാരെ ദുരിതങ്ങൾ ഒഴിയാതെ പിന്തുടരുന്നു. വിസ്മയയുടെ സഹോദരനും മർച്ചന്റ് നേവിയിൽ നാവിഗേറ്റിങ് ഓഫീസറുമായ വിജിത്ത് ഇപ്പോൾ നൈജീരിയയിൽ തടവിലാണ്. വിസ്മയയുടെ മരണം, വിജിത്തിന്റെ ദുരവസ്ഥ... നൊമ്പരമാക്കാനാകാതെ വിസ്മയയുടെ അച്ഛൻ ത്രിവിക്രമൻ നായരും അമ്മ സജിതയും വിജിത്തിന്റെ ഭാര്യ ഡോ. രേവതിയും.

കണ്ണീർക്കടലിലേക്ക്

മാസങ്ങൾക്കുമുമ്പ്, മകൻ നീലിന്റെ ചോറൂണ് കഴിഞ്ഞാണ് വിജിത്ത് ഹെറോയിക് ഐഡൻ എന്ന കപ്പലിൽ ജോലിക്കായി പോയത്. ഓഗസ്റ്റ് ഏഴിന് ദക്ഷിണാഫ്രിക്കയിൽ നിന്ന് നൈജീരിയയിലെത്തി ക്രൂഡ് ഓയിൽ നിറയ്ക്കാനായി കപ്പൽ പുറപ്പെട്ടു. നെതർലൻഡിലെ നോട്ടർ ഡാമിലാണ് ക്രൂഡ് ഓയിൽ എത്തിക്കേണ്ടിയിരുന്നത്. കപ്പലിലെ 16 ജീവനക്കാരും ഇന്ത്യക്കാരാണ്. മലയാളികളായി മൂന്നുപേരുണ്ടായിരുന്നു; വിജിത്തിനെക്കൂടാതെ എറണാകുളംകാരായ സനു ജോസ്, മിൽട്ടൺ എന്നിവർ.