ഷൈലമ്മ അഥവാ സ്റ്റൈലമ്മ

വഴിമുട്ടിയ ജീവിതത്തെ മുടിവെട്ടി തിരിച്ചുപിടിക്കുകയാണ് കൈനകരി തുരുത്തിലെ പെൺബാർബർ ഷൈലമ്മ

-  വിഷ്ണു  രാമകൃഷ്ണൻ

ആലപ്പുഴ കൈനകരി കുട്ടമംഗലം ചെറുകായൽച്ചിറ തുരുത്തിലെ കൊച്ചുവീടിന്റെ ഉമ്മറത്ത് ഒരു ബോർഡ് കാണാം. ഹെവൻ സലൂൺ'. അതാണ് ഷൈലമ്മയുടെ തട്ടകം. തുരുത്തിലെ പുരുഷന്മാരെയെല്ലാം നല്ല സ്റ്റൈലന്മാരാക്കി പുറംലോകത്തെത്തിക്കുന്നത് അവരുടെ കൈകളാണ്. അങ്കണവാടി ഹെൽപ്പറായിരുന്ന ഷൈലമ്മ കോവിഡ്കാലത്ത് ജീവിതം മുന്നോട്ടോടിക്കാൻ കരുതലായൊന്നും കൈവശമില്ലാതെ വന്നതോടെയാണ് വീടിന്റെ ചുമരിൽ ബോർഡ് തൂക്കിയത്. അങ്ങനെയവർ തുരുത്തിലെ ആദ്യ വനിതാ ബാർബറായി. വരുമാനം നിലയ്ക്കുമെന്ന സാഹചര്യത്തിൽ അറിയാവുന്ന ഏക തൊഴിലായ മുടിവെട്ട് ഷൈലമ്മ തിരഞ്ഞെടുക്കുകയായിരുന്നു. വീടിന്റെ ഉമ്മറം തന്നെ ബാർബർ ഷോപ്പാക്കി. പ്രതിസന്ധികളോട് മല്ലിടാൻ ഇഷ്ടതൊഴിൽ തുണയായതിന്റെ സന്തോഷം അവരുടെ മുഖത്ത് തെളിഞ്ഞുനിൽക്കുന്നു. അങ്കണവാടിയിലെ ജോലിത്തിരക്കുകളിൽനിന്ന് അല്പം ഇടവേളയെടുത്ത് തെളിഞ്ഞ  ചിരിയോടെ, മുഖത്തെ വെപ്രാളം ഒട്ടും മറയ്ക്കാതെ ഷൈലമ്മ സംസാരിച്ചു തുടങ്ങി.

 പരീക്ഷണം വിജയം