തിരിഞ്ഞുകൊത്തുന്ന കാല്പനിക കള്ളങ്ങൾ

ഇന്ത്യൻ മണവാട്ടിമാർക്ക് ഒരു കൈപ്പുസ്തകം വഴിനടത്തിയ ജീവിതാനുഭവങ്ങളുടെ വെളിച്ചത്തിൽ മുൻപേനടന്ന ഒരുവൾ നൽകുന്ന മുന്നറിയിപ്പുകൾ കണക്കെ ചില ചെറുകുറിപ്പുകൾ

- ആർ. രാജശ്രീ

വലിയ ദുരന്തങ്ങളൊഴിവാക്കാൻ ചില അപ്രിയസത്യങ്ങൾ പറയാതിരിക്കാം, പക്ഷേ, നുണ പറയരുത്. ഭാവിയിൽ അവ നമ്മെത്തന്നെ തിരിഞ്ഞുകൊത്തുമ്പോൾ നിസ്സഹായതയുടെ വിഷം തീണ്ടി നാം നീലിച്ചുപോവാതിരിക്കാനാണ്

മനുഷ്യരുടെ കാര്യം വളരെ വിചിത്രമാണ്. ഒരു പരിചയവുമില്ലാത്തവരുടെ ജീവിതം ചിലപ്പോൾ നമ്മുടെ ജീവിതവുമായി ചില അംശങ്ങളിൽ കൂട്ടിമുട്ടിയേക്കാം.

പ്രിയ ഞാൻ ജോലി ചെയ്ത സ്‌കൂളിലെ ഗസ്റ്റ് അധ്യാപികയായിരുന്നു. ഉണ്ടായിരുന്നിടത്തൊക്കെ അനഭിമതയായ ഒരുവളാണ് അവളെന്ന് മറ്റുള്ളവരിൽ നിന്ന് അറിഞ്ഞു. വരുന്ന ദിവസങ്ങളിൽ ആരോടും മിണ്ടാതെ സ്റ്റാഫ് റൂമിലിരിക്കും. ആരെങ്കിലും തമാശ പറഞ്ഞാൽ, തന്നെക്കുറിച്ചാണതെന്ന് ഉറപ്പിച്ച് ദേഷ്യപ്പെടും. ചിലപ്പോൾ കരയും. പല ദിവസങ്ങളിലും അവളെ സ്കൂളിൽ നിന്ന് കൊണ്ടുപോകാൻ അവളുടെ പ്രായമായ അച്ഛനാണ് ടൂവീലറിൽ വന്നിരുന്നത്.