தலைக்கூத்தல்

தமிழ்நாட்டில் விருதுநகர் பகுதிகளில் நடக்கும் கொடூரமான ஒரு நிகழ்வு தான் இந்த தலைக்கூத்தல்.

வயோதிகத்தால் படுத்த படுக்கையாகி விடும் முதியோரை பார்த்துக்கொள்ள முடியாத சூழலில் அதிகமான இளநீரை கொடுத்து எண்ணெய் தேய்த்து தலைக்கு குளிர்ந்த நீரால் ஊற்றி விட, ஜன்னி வந்து அவர்கள் உயிர் பிரிந்து விடும்.

இந்த நிகழ்வை நேசமும் நெகிழ்வுமான ஒரு படைப்பாக திரைக்குத் தந்து இருக்கிறார் இயக்குனர் ஜெயபிரகாஷ் ராதாகிருஷ்ணன்.

கதை கோவில்பட்டியில் நடக்கிறது. மகனுடன் சேர்ந்து கட்டிடம் கட்டும் போது மாடியில் இருந்து தவறி கீழே விழுந்த அப்பா அதன்பிறகு அசைவின்றி படுத்த படுக்கையாகி விடுகிறார்.

அதன்பிறகு தந்தையின் பராமரிப்பதிலேயே மகன் சமுத்திரக்கனிக்கு நேரம் போய் விட, வருமானம் தரக்கூடிய தன் கட்டுமானப் பணியை விட்டுவிட்டு இரவு நேர வாட்ச்மேன் வேலையில் சேர்கிறார்.

அந்த வருமானம் போதாத நிலையில் அவர் மனைவி வசுந்தராவும் தீப்பெட்டி தொழிற்சாலைக்கு வேலைக்கு போக வேண்டிய கட்டாயம். அங்கே மேஸ்திரியின் பாலியல் தொந்தரவையும் சமாளித்தாக வேண்டிய நிலை.

இந்த தம்பதிகளின் மகள் பள்ளியில் படித்து வருகிறாள். தாத்தா என்றால் இவளுக்கும் உயிர்.