மணலில் அமிலத்தன்மை...என்ன செய்யும்?

மண்ணிலிருந்து உற்பத்தியாகும் தாவரங்கள் மற்றும் ஜீவராசிகள் போன்றவற்றை சார்ந்தே மனிதன் வாழ்கிறான்.

தாவர வளர்ச்சிக்குத் தேவையான தாதுக்கள் அடங்கிய பல அடுக்குகளைக் கொண்ட மணல் அமைப்பில், மேல் பகுதி மற்றும் தாவரத்தின் வேர் மண்டலத்தை தாங்கி, சத்துக்களைக் கொடுக்கும் அடிமண் பகுதி முக்கியமானவை.

வெப்பத்தினால் பாறைகள் விரிவடைந்து சுருங்குவதால் தகர்தல் ஏற்படுகிறது. நீரோட்டங்கள் மற்றும் நீர் உறைதல் ஆகியவற்றால் பாறையில் அரிமானம் ஏற்படுகிறது.

அந்த வகையில் காலநிலை மாற்றத்தால் பல இடங்களில் மண்ணில் அமிலத் தன்மை காணப்படுகிறது. இந்த நிலையில் 2030-ஆம் ஆண்டுக்குள் இந்தியாவில் உள்ள 77 மாவட்டங்களில் மண் அமிலத்தன்மையாக மாறக்கூடிய சூழல் உள்ளது என்ற அதிர்ச்சி தகவல் வெளியாகியுள்ளது. இதில் சுமார் 70 சதவீதம் கிழக்கு மற்றும் தெற்கு இந்தியாவில் உள்ளது.

ஐக்கிய நாடுகள் சபையின் அறிக்கை குறித்து நேச்சர் இதழில் வெளியிடப்பட்ட அறிக்கையில் இந்த தகவல்கள் வெளியாகியது. அந்த வகையில் உலகின் மொத்த பரப்பளவில் சுமார் 20 முதல் 40 சதவீதம் வரை நில சீரழிவால் பாதிக்கப்பட்டு வருகிறது என்பது அதிர்ச்சி தரும் செய்தியாகும்.

புதை வடிவ எரிபொருட்கள் என்று சொல்லக்கூடிய நிலக்கரி, பெட்ரோல், இயற்கை எரிவாயு ஆகியவற்றை நாம் மோட்டார் வாகனங்கள், மின் நிலையங்கள், வீடுகள், தொழிற்சாலைகள் ஆகியவற்றில் எரிபொருளாகப் பயன்படுத்தும்பொழுது அவை சல்பர் டை ஆக்சைடு மற்றும் நைட்ரஜன் ஆக்சைடு வெளியேறி அவை காற்றின் மூலம் வளிமண்டலத்தை அடைகிறது.

அப்படி அடையும்போது அமிலமாகவும் நைட்ரிக் அமிலமாகவும் ரசாயன மாற்றமடைந்து மழையுடன் சேர்ந்து அமில மழையாகவோ பனி அல்லது புகை மூட்டமாகவோ பூமிக்கு வருகிறது.

இம்மழை அரிப்பு தன்மை கொண்டதால் பலவித சுற்றுச்சூழல் பாதிப்புகளை ஏற்படுத்துகிறது. இது தொழில் மயமாக்களால் ஏற்பட்ட விளைவு. மேலும், இது பெருமளவில் சூழலியல் சிக்கல்களை தோற்றுவிக்கிறது.