രാവിലെ അഞ്ചുമണി മുതൽ 8 മണി വരെ മീൻകാരി; പിന്നെ നഗരസഭാ അധ്യക്ഷ

രാവിലെ അഞ്ചുമണി മുതൽ 8 മണി വരെ വൈക്കത്തെ കോലോത്തു കടവ് മീൻമാർക്കറ്റിൽ ചെന്നാൽ കൂട്ടിയിട്ട മത്തിയുടെയും അയലയുടെയും നെത്തോലിയുടെയുമൊക്കെ പേര് വിളിച്ച് ആളെ ആകർഷിച്ചു കച്ചവടം ചെയ്യുന്ന പ്രീതാ രാജേഷിനെ പിന്നെ കാണുന്നത് നഗരസഭാ അധ്യക്ഷയുടെ കസേരയിൽ.

- പി. ജയചന്ദ്രൻ

കോട്ടയം ജില്ലയിൽപ്പെട്ട വൈക്കം പലവിധ കാരണങ്ങളാൽ പ്രശസ്തവും പ്രസിദ്ധവുമായ ഒരു നഗരപ്രദേശമാണ്. കേരളചരിത്രത്തിൽ വരെ ഇടംപിടിച്ച സ്ഥലം. വൈക്കം സത്യാഗ്രഹം എന്ന ഒറ്റ സംഭവം മതി അതിന് അടിവരയിടുവാൻ.

ദക്ഷിണകാശി എന്ന പേരിൽ അറിയപ്പെടുന്ന വൈക്കം മഹാദേവക്ഷേത്രം കേരളത്തിലെ പ്രശസ്തമായ ഒരു തീർത്ഥാടന കേന്ദ്രമാണല്ലോ. രാജ്യത്തെ തന്നെ വിവിധ ഭാഗങ്ങളിൽ നിന്നും ആയിരക്കണക്കിന് ആത്മീയ തീർത്ഥാടകരാണ് ഓരോ വർഷവും ഈ മഹാക്ഷേത്രം സന്ദർശിക്കുവാൻ എത്തുന്നത്. അക്കാര്യത്തിൽ ജാതിഭേദങ്ങളൊന്നും ഇല്ല എന്നുള്ളതാണ് എടുത്തു പറയേണ്ടുന്ന കാര്യം.

എന്നാൽ കൃത്യമായി പറഞ്ഞാൽ ഒരു നൂറ്റാണ്ടു മുമ്പ് വരെ അതായിരുന്നില്ല അവസ്ഥ. ക്ഷേത്രത്തിൽ ദർശനം നടത്തുവാൻ പോയിട്ട് ക്ഷേത്രത്തിലേക്കുള്ള പൊതുവഴിയിലൂടെ വഴിനടക്കാൻ പോലും താഴ്ന്ന ജാതിയിൽപ്പെട്ടവർക്ക് ഒരുകാലത്ത് അവകാശമുണ്ടായിരുന്നില്ല. അതിനെതിരെ നടന്ന ഐതിഹാസികമായ സമരം ഇന്ത്യയുടെ തന്നെ സാമൂഹ്യ നവോത്ഥാന ചരിത്രത്തിലെ തിളക്കം കൂട്ടുന്ന ഒരു ഏടാണ്. ശ്രീനാരായണഗുരുവിന്റെയും മഹാത്മാഗാന്ധിയുടെയും പിന്തുണയും സത്യാഗ്രഹപ്പന്തൽ സന്ദർശനവും എടുത്തു പറയേണ്ടുന്ന സംഗതികളാണ്. 1924 മാർച്ച് 30ന് ആരംഭിച്ച സമരം 603 ദിവസം നീണ്ടു നിന്നപ്പോൾ പെരിയോർ ഇ. കെ. രാമസ്വാമി നായ്ക്കറും സത്യാഗ്രഹപ്പന്തലിലെത്തി സത്യാഗ്രഹികൾക്ക് ആവേശം പകർന്നു. അവർണരുടെ അവകാശ സംരക്ഷണത്തിനായി മന്നത്ത് പത്മനാഭന്റെ നേതൃത്വത്തിൽ വൈക്കത്തുനിന്ന് തിരുവനന്തപുരത്തേക്ക് നടത്തിയ സവർണ്ണ ജാഥയും ചരിത്രത്തിലെ സമാനതകളില്ലാത്ത അധ്യായമാണ്.

ഈ വൈക്കത്താണ് സഖാക്കളുടെ സഖാവായ പി. കൃഷ്ണപിള്ളയും, ബേപ്പൂർ സുൽത്താൻ വൈക്കം മുഹമ്മദ് ബഷീറും പഞ്ചവൻ കാടിന്റെ കഥ പറഞ്ഞ വൈക്കം ചന്ദ്രശേഖരൻ നായരും മെഗാസ്റ്റാർ മമ്മൂട്ടിയുമൊക്കെ പിറവികൊണ്ടത്.