കറുപ്പിന്റെ രാഷ്ട്രീയം

അഭിനേത്രിയും നർത്തകിയുമായ അശ്വതി മനസ്സ് തുറക്കുന്നു

- ആർ.കെ

ചെറുപ്പകാലത്തെ ചില തമാശകൾ പിന്നീട് വളർന്നുകഴിയുമ്പോൾ ഇൻസെക്യൂരിറ്റികൾ ആയി മാറാറുണ്ട്. ഒരു മനുഷ്യന്റെ ആത്മ വിശ്വാസത്തെപ്പോലും തച്ചുടയ്ക്കാൻ കഴിവുണ്ട് ബോഡി ഷെമിങ് തമാശകൾക്ക്.

ഡെൽഹി പോലൊരു നോർത്ത് ഇന്ത്യൻ നഗരത്തിൽ പഠിച്ചു വളർന്ന ഞാൻ കുഞ്ഞുന്നാൾ മുതൽ കേൾക്കുന്നതാണ് നിറത്തിന്റെ പേരിലുള്ള പല വിമർശനങ്ങൾ. അന്ന് കറുത്ത കുട്ടി എന്ന പേരിൽ അറിയപ്പെട്ടിരുന്ന ഞാൻ ഇന്ന് അറിയപ്പെടുന്നത് സിനിമാനടി ആയിട്ടാണ് എന്നത് ഒരു മധുരപ്രതികാരം ആണ്.

കുഞ്ഞുന്നാൾ മുതൽ നൃത്തം അഭ്യസിക്കു കയായിരുന്നു. ഇൻസ്റ്റഗ്രാമിൽ ഫിൽറ്ററുകളില്ലാതെ ഫോട്ടോകളും വീഡിയോകളും അപ്ലോഡ് ചെയ്യുമായിരുന്നു. സൗന്ദര്യത്തിന് ഏറെ പ്രാധാന്യം നൽകുകയും, വെളുത്ത നടിമാരെ ചായം പൂശി കറുത്ത കഥാപാത്രങ്ങളായി മാറ്റുന്ന സിനിമ പോലൊരു മാധ്യമത്തിൽ എന്നെപ്പോലെ കറുത്ത നിറമുള്ള ഒരാൾക്ക് നായികയാകാൻ സാധിക്കും എന്ന വിശ്വാസം വിദൂരസ്വപ്നങ്ങളിൽ പോലും ഉണ്ടായിട്ടില്ല.