தொடர் கருக்கலைப்பு கவனம் அவசியம்!

இன்றைய தலைமுறை தம்பதியினர் திருமணமான ஒரு வருடங்களில் செல்லும் இடம் கருத்தரிப்பு மையமாக மாறிவிட்டது.

- நிஷா

காரணம், இப்போது பலருக்கு குழந்தை பிறப்பது என்பது ஒரு வரம் என்றாகிவிட்டது. இது ஒரு பக்கம் இருக்க மறுபக்கம் 10% பெண்களுக்கு தொடர் கருக்கலைப்பு ஏற்படுகிறது. கருக்கலைப்பு ஏற்பட காரணங்கள் முழுமையாக கண்டறியப்படவில்லை என்றாலும், அதற்கான காரணங்கள் 30% மட்டும் அறியப்பட்டுள்ளதாக தெரிவிக்கிறார் மகப்பேறு நிபுணர் டாக்டர் பாரதி.

‘‘பொதுவாக கருக்கலைப்பு ஏற்படுவது இயற்கை. ஆனால் அதுவே தொடர்ந்து இரண்டு அல்லது மூன்று முறைக்கு மேல் ஏற்பட்டால் அதை ரெக்கரன்ஸ் பிரக்னென்சி லாஸ் அல்லது மிஸ்கேரேஜ் என்று சொல்வோம். இது 10% பெண்களுக்கு ஏற்படுகிறது. ஆனால் அதுவே ஒரு முறை ஏற்பட்டால் சாதாரணமானது. அவர்கள் மீண்டும் கருத்தரிக்கும் போது கரு தங்கி குழந்தையும் பிறக்கும். ரெக்கரன்ஸ் பிரக்னென்சி லாஸ் பொறுத்தவரை அவர்களுக்கு ஒரு முறை மட்டுமல்லாமல் மீண்டும் மீண்டும் கருக்கலைப்பு ஏற்படும். அவ்வாறு ஏற்படும் போது அவர்களுக்கு கரு உருவாகி கலைந்துவிட்டது என்று கூட தெரியாது. மாதவிடாய் காலத்தில் ஏற்படும் ரத்தப்போக்கு என்று நினைப்பார்கள். காரணம், கருத்தரித்த ஒன்றரை மாதத்தில் அவர்களுக்கு கரு கலைந்திடும். அதை அவர்கள் மாதவிடாய் நாட்கள் தள்ளி வருவதாக நினைப்பார்கள்’’ என்றவர் எந்த காரணத்தால் தொடர் கருக்கலைப்பு ஏற்படும் என்பதை விளக்கினார்.