ആവേശത്തിമിർപ്പിൽ ആഘോഷരാവ്

MISS QUEEN KERALA A PEGASUS EVENT

അസ്തമയ സൂര്യന്റെ അരുണ കിരണങ്ങളേറ്റ് മനോഹരിയായ കൊച്ചി കഴിഞ്ഞ മെയ് 31 ആവേശതിരകളലതല്ലിയ ആഘോഷരാവിന് സാക്ഷ്യം വഹിച്ചു. മത്സരത്തിന്റെയും അംഗീകാരത്തിന്റെയും ഉദ്വേഗവും ആഹ്ളാദവും ഒരുപോലെ ആദ്യാവസാനംവരെ കാണികളിൽ നിറച്ച സന്തോഷരാവ്. കൊച്ചി ലെ മെറിഡിയനിൽ മെയ് 31 വൈകുന്നേരം 6.30ന് പെഗാസസ് ഗ്ലോബൽ പ്രൈവറ്റ് ലിമിറ്റഡ് സംഘടിപ്പിച്ച പത്താമത് മണപ്പുറം മിസ് ക്വീൻ കേരള മത്സരവും പതിനാറാമത് മിന്നലൈ ടി വി മീഡിയ അവാർഡും നടന്നു. മണപ്പുറം ഫിനാൻസ് ലിമിറ്റഡ് എം ഡിയും  സിഇഒയുമായ വി പി  നന്ദകുമാർ, പെഗാസസ് ചെയർമാൻ അജിത് രവി പെഗാസസും , പെഗാസസ് പ്രൈവറ്റ് ലിമിറ്റഡ്  ഗ്ലോബൽ മാനേജിംഗ് ഡയറക്ടർ ജെബിത അജിത്തും ചടങ്ങിൽ സന്നിഹിതരായിരുന്നു. മണപ്പുറം ഫൈനാൻസിന്റെയും ഡി ക്യുവിന്റേയും സംയുക്ത സംരംഭത്തിലാണ് സൗന്ദര്യമത്സരം സംഘടിപ്പിച്ചത്.

യുവതലമുറയിലെ സ്ത്രീകൾക്ക്, സ്ത്രീ ശാക്തീകരണം, വൈവിധ്യം, ബുദ്ധി, നേതൃത്വഗുണം എന്നിവ പരിപോഷിപ്പിക്കുവാൻ ഇത്തരം മത്സരങ്ങൾ വേദി ഒരുക്കുന്നുവെന്നതിൽ സംശയമില്ല. കേരളത്തിലെ വിവിധ ഭാഗങ്ങളിൽ നിന്നുള്ള 150 പേരിൽ നിന്നും 16 പേരെയാണ് മത്സരത്തിലേക്ക് തെരഞ്ഞെടുത്തത്. 16 പേരിൽ ഒരു മത്സരാർഥിക്ക് കുടുംബത്തിൽ വേണ്ടപ്പെട്ട ഒരാൾ ഗുരുതരാവസ്ഥയിൽ ആശുപത്രിയിൽ പ്രവേശിപ്പിക്കപ്പെട്ടതിനാൽ മത്സരത്തിൽ പങ്കെടുക്കാനാകില്ലെന്ന് സംഘാടകരെ അറിയിച്ചു. 15 മത്സരാർത്ഥികൾ മിസ് ക്വീൻ കേരള മത്സരത്തിൽ പങ്കെടുത്തു. ഈ മത്സരത്തിന് മൂന്ന് റൗണ്ടുകൾ ഉണ്ടായിരുന്നു. ആദ്യ റൗണ്ടായ ഇന്ത്യൻ എത്നിക് വെയറിൽ മത്സരാർത്ഥികൾ പരമ്പരാഗത ഇന്ത്യൻ വസ്ത്രങ്ങൾ ധരിച്ച് വേദിയിലെത്തിയത് നയനാന്ദകരമായ കാഴ്ചയായിരുന്നു. സെമിഫൈനൽ റൗണ്ടായ ബ്ലാക്ക് കോക്ടെയ്ല് റൗണ്ട് ആയിരുന്നു രണ്ടാമത്തേത്, ഈ റൗണ്ടിൽ 5 മത്സരാർത്ഥികൾ പുറത്തായി. 10 മത്സരാർത്ഥികൾ പൂർണ്ണ ആത്മവിശ്വാസത്തോടെ ജഡ്ജസിന്റെ ചോദ്യങ്ങൾക്ക് ഉചിതമായ മറുപടി നൽകി. പ്രേക്ഷകർക്കിടയിൽ മത്സരത്തിന്റെ പിരിമുറുക്കം സൃഷ്ടിച്ച റൗണ്ടായിരുന്നുവത്. മിസ് ക്വീൻ കേരള മത്സരം സൗന്ദര്യത്തിൽ മാത്രമല്ല, ആത്മവിശ്വാസത്തിന്റെയും സാമൂഹിക പ്രതിബദ്ധതയുടെയും സ്നേഹത്തിന്റെയും പ്രതീകമാണ്. രണ്ടാം റൗണ്ടിൽ ഓരോ മത്സരാർത്ഥിയും ഇഞ്ചോടിഞ്ച് പോരാട്ടമാണ് കാഴ്ചവച്ചത്.