உதயநிதி தந்த 13.99 லட்சம் ரூபாய் சைக்கிள்!

ஷா தபித்தாவுக்கு 15 வயது. 10 வது படிக்கிறார். அப்பா உடன் இல்லை. அம்மாவோ வீட்டு வேலைக்கு மஸ்கட் சென்றுவிட்டார். ஒரு அண்ணன். 17 வயதுதான் ஆகிறது. உள்ளூர் ஒர்க் ஷாப் ஒன்றில் மெக்கானிக் வேலைக்கு செல்கிறார்

- கா.சு.வேலாயுதன்

அம்மாவுக்கு ரூ.15 ஆயிரம் சம்பளம். அதில் ஒரு பகுதியை பிள்ளைகளுக்கு அனுப்புகிறார். அண்ணனுக்கு கூலி வாரம் ரூ.1500 கிடைக்கும். வீட்டு வாடகை கொடுத்து, அன்றாட செலவுகளைத் தாக்குப்பிடித்து வாழ்ந்தும் தபித்தாவுக்கு, தான் படித்த தனியார் பள்ளியில் பீஸ் கட்ட முடியவில்லை.

எனவே 10ம் வகுப்பு பொதுத்தேர்வுக்கு இரண்டு மாதம் இருக்கும் போது அருகாமையில் உள்ள அரசுப்பள்ளி ஒன்றில் சேர்ந்தார். தபித்தாவின் சூழ்நிலை அறிந்து ஆசிரியர்கள் கூடுதல் அக்கறை எடுத்து பாடங்கள் நடத்தினர். தேர்ச்சியும் பெற்றார்.

இந்த நேரத்தில் தபித்தாவுக்கு விளையாட்டுத்துறை அமைச்சர் உதயநிதி ஸ்டாலின் ரூ.13 லட்சத்து 99 ஆயிரம் மதிப்புள்ள இம்போர்ட்டட் ரேஸ் சைக்கிளை வழங்கியுள்ளார்!

எதற்காக இந்த சைக்கிள்?

2022ம் ஆண்டு டிசம்பர் மாதம் 11ம் தேதி முதல் 15ம் தேதி வரை அசாம் மாநிலம் கவுகாத்தியில் நடைபெற்ற 14 வயதிற்குட்பட்டோருக்கான தேசிய அளவிலான சைக்கிளிங் போட்டியில் (Track) வெள்ளிப்பதக்கம் பெற்றுள்ளார். மகாராஷ்ட்ரா மாநிலம், நாசிக்கில் 07.01.2023 முதல் 10.01.2023 வரை நடைபெற்ற 27வது தேசிய அளவிலான மிக இளையோர் (மகளிர்) சைக்கிளிங் போட்டியில் தங்கப்பதக்கம் வாங்கியுள்ளார்.

சமீபத்தில் தேசிய அளவில் நடைபெற்ற சைக்கிளிங் போட்டியில் வெற்றி பெற்று, இப்பொழுது National Centre of Excellence (NCOE) மூலமாக தேர்வு செய்யப்பட்டு பயிற்சி மேற்கொண்டு வருகிறார்.

அதன்மூலம் ஷா தபித்தா பன்னாட்டு அளவிலான போட்டிகளில் பங்கேற்று வெற்றி பெறுவதற்கு ஆசைப்பட்டார். அதற்கு ஏதுவாக இப்போட்டிகளுக்கு என்றே பிரத்யேகமாக வடிவமைக்கப்பட்ட ரேஸ் சைக்கிள் வேண்டும். என்ன செய்யலாம்?

மார்ச் மாதம் இளைஞர் நலன் மற்றும் விளையாட்டு மேம்பாட்டுத் துறை அமைச்சர் உதயநிதிக்கு கோரிக்கைக் கடிதம் அனுப்பினார். எண்ணி மூன்றே மாதம். கடந்த 22ம் தேதி மாணவியை சென்னை தலைமைச் செயலகத்திற்கு நேரில் வரவழைத்து தமிழ்நாடு சாம்பியன்ஸ் அறக்கட்டளை சார்பில்  ரூபாய் 13.99 லட்சம் மதிப்பீட்டிலான Argon 18 PRO (Complete bike) Competition Wheel Set, Mavic Front Five Spoke Wheel Set and Mavic Rear Dic Wheel set சைக்கிளை வழங்கியிருக்கிறார் அமைச்சர் உதயநிதி.