ஹேய் நெஞ்சாத்தியே..!

மலையாளம், கன்னடம் என யூ-டர்னில் சுற்றிக்கொண்டிருந்த காஷ்மீர் அழகி. சட்டென ‘காற்று வெளியிடை’ படம் மூலம் தமிழ் பக்கம் காற்று வீச, தொடர்ந்து ‘விக்ரம் வேதா’, ‘இவன் தந்திரன்’ என தமிழிலும் பிஸியாகி தமிழ் நெஞ்சங்களை ‘ஹேய் நெஞ்சாத்தியே... நீதானடி...’ (‘விக்ரம் வேதா’ யாஞ்சி பாடல்) என உருகவைத்து தில்லான பாத்திரங்கள், படங்கள் என தனித்துவமான இடம் பிடித்த நடிகையாக மாறியவர்தான் ஷ்ரத்தா ஸ்ரீநாத். இதோ தமிழ், தெலுங்கு, இந்தி , கன்னடம் என படு பிஸி.

- ஷாலினி நியூட்டன்

வித்யாசமான கதாபாத்திரங்கள்தான் தேர்வு செய்யணும்னு ஏதும் தீர்மானமா இருக்கீங்களா?

முதலில் நீங்க எப்படி இருக்கீங்க... சந்திச்சு ரொம்ப நாட்களாச்சு! வெளிப்படையா சொல்லணும்னா... ஆமா, நான் இந்த டூயட் பாடிக்கிட்டு, சும்மா கலர்ஃபுல் கண்காட்சிக்காக படம் செய்யக் கூடாது என்கிறதிலே கறாரா இருக்கேன்.

‘இறுகப்பற்று’... உங்க கேரக்டர் பற்றி சொல்லுங்க..?

படத்துல என் பெயர் மித்ரா மனோகரன். நான் ஒரு திருமண கவுன்சிலிங் கொடுக்கற தெரபிஸ்ட். எனக்கே திருமணம், உறவில் சிக்கல், இதெல்லாம் வந்தால் என்ன செய்வேன்... எப்படி சமாளிப்பேன்... இதுதான் என்னுடைய கேரக்டர். எனக்கு ஜோடியாக விக்ரம் பிரபு. முதல் முறையாக அவர் கூட நடிச்சிருக்கேன். நல்ல டெடிகேஷனான நடிகர்.

எங்களை மாதிரியே இன்னும் ரெண்டு ஜோடிகள், ‘மாநகரம்’ ஸ்ரீ, விதார்த், அபர்ணதி, சான்யா நடிச்சிருக்காங்க. அவங்களுக்கும் உறவில் பிரச்னை... எல்லாமுமா சேர்ந்து கிளைமாக்ஸ் என்ன, கதைக்களம் என்ன, எங்க மூணு ஜோடிகளுக்கும் கனெக்ட் இருக்கா... இதெல்லாம்தான் ‘இறுகப்பற்று’.

இயக்குநர் யுவராஜ் தயாளன், கதை சொன்ன விதமே எனக்கு ரொம்ப பிடிச்சிருந்தது. உடனே ஓகே சொல்லிட்டேன். என்னுடைய கேரக்டர் மட்டும் இல்லாம எல்லாருக்குமே ஆழமான கேரக்டர்கள்.

இந்தப் படத்தின் மூலம் நீங்கள் புரிந்துகொண்ட ரிலேஷன்ஷிப் என்ன?