ലക്ഷാധിപതികൾ

കഥക്കൂട്ട് 

- തോമസ് ജേക്കബ്

പ്രസാധകരുടെ പൂക്കാലമാണിത്. ഓരോ ജില്ലയിലുമുണ്ട് അൻപതോളം പ്രസാധകർ. മിക്ക ഡിടിപി ഓപ്പറേറ്റർമാരും പ്രസാധകരാണ്. ഇവരെല്ലാം കൂടി പ്രതിദിനം മുപ്പതോളം പുസ്തകങ്ങൾ പുറത്തിറക്കുന്നു.

മുൻപ് ഇതായിരുന്നില്ല സ്ഥിതി. പത്തൊൻപതാം നൂറ്റാണ്ടിന്റെ അവസാനത്തിൽ സ്കൂൾ പാഠപുസ്തകങ്ങളൊഴിച്ചാൽ ഒരു വർഷം പത്തോളം പുസ്തകങ്ങളേ മലയാളത്തിൽ പുറത്തുവന്നിരുന്നുള്ളൂ.

വടക്കുംകൂർ രാജരാജവർമയുടെ കെട്ടുകെട്ടായുള്ള കയ്യെഴുത്തു പ്രതികളും ഒ.എം. ചെറിയാന്റെ പതിമൂവായിരത്തിൽ പരം കയ്യെഴുത്തു പേജുകളുള്ള ഹൈന്ദവ ധർമസുധാകര'വും. അവരുടെ കാലം കഴിഞ്ഞും അച്ചടിക്കാതെ കിടന്നു. ഹൈന്ദവധർമ സുധാകരത്തിന്റെ കാര്യത്തിൽ ഡി.സി.കിഴക്കെമുറിക്കുപോലും കൈപൊള്ളി. ഈ മഹാകൃതി ജനങ്ങളിലെത്തിക്കാതിരിക്കുന്നതു വലിയ പാതകമാണെന്നു പലരും നേരിട്ടു പറഞ്ഞപ്പോൾ കോഴിക്കോട്ടെ രാമകൃഷ്ണമിഷൻ അധ്യക്ഷനായിരുന്ന സിദ്ധിനാഥാനന്ദ സ്വാമി എഡിറ്ററും ഓംചേരി അസോഷ്യേറ്റ് എഡിറ്ററു മായി ആ പുസ്തകം പ്രസിദ്ധീകരിക്കാൻ ഡിസി തയാറായി. പരസ്യം ചെയ്തിട്ടും ഭാരിച്ച അച്ചടിച്ചെലവിനനുസരണമായി വേണ്ട വരുമാനം പ്രീപബ്ലിക്കേഷൻ വ്യവസ്ഥയിൽ ലഭിക്കാതെ വന്നപ്പോൾ ഡിസിക്ക് അതിൽനിന്നു പിൻമാറേണ്ടിവന്നു. പിന്നീടു മറ്റൊരു പ്രസാധകനാണ് ആ പുസ്തകം പുറത്തിറക്കിയത്.