അപ്രതീക്ഷിതം

കഥക്കൂട്ട്

- തോമസ് ജേക്കബ്

യാദൃച്ഛികത്വം എത്രത്തോളമാവാം? കെട്ടുകഥകളെക്കാൾ അവിശ്വസനീയമാണ് ചില സംഭവകഥകൾ.

ജോലിയൊന്നുമില്ലാതെ വട്ടംതിരിയുന്ന കാലത്ത് കടമ്മനിട്ട രാമകൃഷ്ണന് പോസ്റ്റൽ അക്കൗണ്ട്സ് ആൻഡ് ഓഡിറ്റ് വകുപ്പിൽ ജോലി കിട്ടിയതിനെപ്പറ്റി കെ.എസ്. രവികുമാർ എഴുതിയിട്ടുണ്ട്.

കൊല്ലത്ത് ഒരു പാർട്ടി യോഗത്തിൽ സംബന്ധിച്ച് തിരികെ വരികയായിരുന്നു കടമ്മനിട്ട. നേരം വളരെ ഇരുട്ടിയതിനാൽ കോഴഞ്ചേരിയിൽ നിന്നു കടമ്മനിട്ട വരെയുള്ള എട്ടു കിലോമീറ്റർ നടക്കുകയാണ്. വഴിയരികിൽ ഒരു സുഹൃത്തിന്റെ വീട്ടിൽ രാത്രി വൈകിയും വെളിച്ചം കണ്ടു കയറി. പോസ്റ്റൽ അക്കൗണ്ട്സിന്റെ മദ്രാസ് റീജനൽ ഓഫിസിൽ ബിരുദധാരികളെ ക്ലാർക്കുമാരായി നിയമിക്കുന്നുവെന്ന് അറിയിപ്പു കണ്ട് അതിനുള്ള അപേക്ഷ തയാറാക്കുകയായിരുന്നു, സുഹൃത്ത്. രാമകൃഷ്ണനും അപേക്ഷ തയാറാക്കി അയച്ചു. അങ്ങനെയാണു ജോലി കിട്ടിയത്.