രേഖ.. റാണി.. അംബിക..

ശ്രീ മുത്തപ്പൻ... ഗോളം... മന്ദാകിനി...അല എസ് നയന ഹാപ്പിയാണ്

- ബിന്ദു പി.പി

കണ്ണൂർ തളിപ്പറമ്പ് ബക്കളത്ത് നിന്ന് മലയാള സിനിമയിലേക്ക് വണ്ടികയറിയ അല എസ് നയന സംജാദ് സംവിധാനം ചെയ്ത ഗോളത്തിലൂടെയും വിനോദ് ലീല സംവിധാനം ചെയ്ത മന്ദാകിനിയിലൂടെയും ചന്ദ്രൻ നരിക്കോട് ചിത്രം ശ്രീ മുത്തപ്പനിലൂടെയും തിയേറ്ററുകളിൽ തിളങ്ങുകയാണ്. ഒരേ സമയം തിയേറ്ററുകളിൽ എത്തിയ മുന്ന് സിനിമകൾ.. വ്യത്യസ്തമായ ജോണർ.. വ്യത്യസ്തമായ മുന്ന് ശക്തമായ കഥാപാത്രങ്ങൾ... ഇതിൽപരം മറ്റെന്ത് സന്തോഷമെന്ന് അല എസ് നയന പറയുന്നു. ആറാം ക്ലാസിൽ ആദ്യമായി ക്യാമറയ്ക്ക് മുന്നിൽനിന്ന് തുടങ്ങിയ അല തന്റെ സിനിമാ ജീവിതവിശേഷങ്ങൾ നാനയോട് ഇതാദ്യമായി പങ്കുവയ്ക്കുന്നു...

മൂന്ന് സിനിമകൾ, വ്യത്യസ്ത കഥാപാത്രം

കരിയർ തുടങ്ങി അതിന്റെ ഏറ്റവും സന്തോഷം നൽകുന്ന പോയിന്റിലാണ് ഇപ്പോൾ നിൽക്കുന്നത്. ഒരേസമയം തിയേറ്ററുകളിൽ കയ്യടി നേടിക്കൊണ്ടിരിക്കുന്ന മൂന്ന് സിനിമകളിൽ ശ്രദ്ധേയ വേഷങ്ങൾ ചെയ്യാൻ കഴിഞ്ഞു.

ഗോളത്തിലെ റാണിയായാലും മന്ദാകിനിയിലെ അംബികയായാലും ശ്രീ മുത്തപ്പനിലെ രേഖയായാലും പ്രേക്ഷകർ ശ്രദ്ധിച്ചു.. നല്ല അഭിപ്രായങ്ങൾ പറയുന്നു. മൂന്ന് സിനിമകളുടെയും ജോണർ തന്നെ വ്യത്യസ്തമായതു കൊണ്ട് ഒരു അഭിനേത്രി എന്ന നിലയിൽ ഒരേസമയം പ്രൂവ് ചെയ്യാനും സാധിച്ചുവെന്ന സന്തോഷമുണ്ട്. മുൻപും സിനിമകൾ ചെയ്തിട്ടുണ്ടെങ്കിലും ഒരു ഐഡന്റിറ്റി ക്രൈസിസ് ഉണ്ടായിരുന്നു. പക്ഷേ ഇപ്പോൾ പുറത്തു പോവുമ്പോൾ പലരും തിരിച്ചറിയുന്നു. കഥാപാത്രങ്ങളുടെ അഭിപ്രായവും സ്നേഹവും അറിയിക്കുന്നു. അത് സന്തോഷം നൽകുന്ന കാര്യമാണ്. വലിയ രീതിയിൽ സോഷ്യൽ മീഡിയയിൽ ആക്റ്റീവ് അല്ലാത്ത ഒരാളാണ് ഞാൻ. പക്ഷേ ഇപ്പോൾ പല ഗ്രൂപ്പുകളിലും ഞാൻ ചെയ്ത കഥാപാത്രങ്ങളെയും എന്നെ കുറിച്ചും നടക്കുന്ന ചർച്ചകൾ അഭിനേത്രി എന്ന നിലയിൽ മുന്നോട്ട് പോകാനുള്ള ഊർജ്ജമാവുന്നുണ്ട്.

ലാൽജോസ് സാറിന്റെ ഭാര്യാവേഷം