કોમનવેલ્થ ગેમ્સ, ૨૦૨૨: આ રીતે નિખર્યા છે ભારતના આ ‘સુવર્ણવીર’

તાજેતરમાં ઈંગ્લેન્ડના બર્મિઘમમાં કોમનવેલ્થ ગેમ્સ યોજાઈ હતી. ૮ ઓગસ્ટ, ૨૦૨૨ ના રોજ જ્યારે આ ગેમ્સ સમાપ્ત થઈ, ત્યાં સુધી ભારતે ૨૨ ગોલ્ડ મેડલ, ૧૬ સિલ્વર મેડલ અને ૨૩ બ્રોઝ મેડલ જીતી લીધા હતા અને ભારત ઓસ્ટ્રેલિયા, ઈંગ્લેન્ડ અને કેનેડા પછી ચોથા નંબરે રહ્યું હતું

- સુનીલ શર્મા

ભારતમાં જ્યારે કોઈ ખેલાડી કોઈ ઈન્ટરનેશનલ ગેમ ઈવેન્ટમાં મેડલ જીતે છે ત્યારે તેમને ખૂબ માનસન્માન મળતા હોય છે. પરિવારજનો અને કેટલાક સગાંસંબંધી એરપોર્ટ પર ઢોલનગારા સાથે તેમનું સ્વાગત કરતા હોય છે, નેતાઓ તેમાં પોતાની જાતિ શોધીને પોતાની વાહવાહી કરાવતા હોય છે અને જનતા સોશિયલ મીડિયા પર થોડી ઘણી સારીનરસી વાતો લખીને આગળ વધી જાય છે. આ રીતે થોડા વર્ષમાં તેમને ભૂલી જવામાં આવે છે.

દુખ અને આશ્ચર્યની વાત એ છે કે એકાદબેને છોડીને કોઈ પણ આવા ખેલાડીઓએ કરેલા સંઘર્ષ અને મહેનત વિશે સપનામાં પણ નથી વિચારી શકતા, પરંતુ હા, તેમની ભૂલો શોધવામાં કોઈ પાછળ નથી રહેતું.

તાજેતરમાં ઈંગ્લેન્ડના બર્મિઘમમાં કોમનવેલ્થ ગેમ્સ યોજાઈ હતી. ૮ ઓગસ્ટ, ૨૦૨૨ ના રોજ જ્યારે આ ગેમ્સ સમાપ્ત થઈ, ત્યાં સુધી ભારતે ૨૨ ગોલ્ડ મેડલ, ૧૬ સિલ્વર મેડલ અને ૨૩ બ્રોઝ મેડલ જીતી લીધા હતા અને ભારત ઓસ્ટ્રેલિયા, ઈંગ્લેન્ડ અને કેનેડા પછી ચોથા નંબરે રહ્યું હતું.

ભારતના ખાતામાં કુલ ૬૧ મેડલ આવ્યા. ભલે ને મેડલનો રંગ ગમે તે રહ્યો હોય, પરંતુ જે ખેલાડીએ તેને પોતાના ગળામાં પહેરવાનું ગૌરવ પ્રાપ્ત કર્યું, તે તેની વર્ષોની સખત મહેનતનું મીઠું ફળ હતું.

જો માત્ર ગોલ્ડ મેડલ જીતનારા પર નજર નાખીએ તો જાણ થશે કે તેમાંના મોટાભાગના ખેલાડી એવા હતા, જેમણે પોતાના ઉત્સાહ, પ્રબળ ઈચ્છા અને સખત મહેનતથી સાબિત કરી દીધું છે કે ભલે ને ગરીબાઈ માર્ગમાં અડચણરૂપ બનીને ઊભી રહી જાય, પરંતુ જો પોતાના પર ભરોસો હોય તો કોઈ પણ અડચણને પાર કરવી મુશ્કેલ નથી.

૨૨ ગોલ્ડ મેડલ જીતનાર આ ‘સુવર્ણવીર’ ખેલાડીઓ વિશે જાણીને પણ આ વાત સમજમાં આવશે: 

મીરાબાઈ ચાનૂ

વર્ષ ૨૦૨૨ ની કોમનવેલ્થ ગેમ્સમાં ૪૯ કિલોગ્રામ વેઈટગ્રૂપમાં ગોલ્ડ મેડલ જીતનાર આ મહિલાનો જન્મ ૮ ઓગસ્ટ, ૧૯૯૪ ના રોજ ભારતના મણિપુર રાજ્યની રાજધાની ઈમ્ફાલના નાગાપોર વિસ્તારમાં થયો હતો.

એક જાણીતા દૈનિક સમાચારપત્ર (હિંદુસ્તાન) ના સમાચાર અનુસાર, જ્યારે મીરાબાઈ ચાનૂ પોતાના ઘરમાં રસોઈ માટેના લાકડા લાવતી ત્યારે પોતાના ભાઈના કરતા વધારે વજન ઉઠાવી લેતી હતી. તે સમયે તેની ઉંમર માત્ર ૧૨ વર્ષની હતી. આ જોયા પછી માતાપિતાએ તેની આ પ્રતિભાને ઓળખી અને તેને રમતના ક્ષેત્રમાં આગળ વધવા કહ્યું.