ദശരഥപ്രതിഭ

എന്റെ വായനാനുഭവങ്ങളിലെ മികച്ച ആത്മകഥ ശ്രീകുമാരൻ തമ്പി രചിച്ച ജീവിതം ഒരു പെൻഡുലം' എന്ന പുസ്തകമാണ്

- മധു

എത്രയെഴുതിയാലും തീരാത്ത അനുഭവങ്ങളുടെ മറക്കാനാവാത്ത ഏടുകളാണ് എനിക്ക് ശ്രീകുമാരൻ തമ്പി. പക്ഷേ, എഴുതുമ്പോൾ എന്തെഴുതണം എന്ന സംശയം മാത്രം ബാക്കിയാവുന്നു. സംവിധായകനും നിർമാതാവുമായ ശ്രീകുമാരൻ തമ്പിയെക്കുറിച്ച് എഴുതണോ, തിരക്കഥാകൃത്തും ഗാനരചയിതാവുമായ തമ്പിയെക്കുറിച്ച് എഴുതണോ, എഞ്ചിനീയറായ തമ്പിയെക്കുറിച്ച് എഴുതണോ ഇങ്ങനെ ഒരുപാട് ചോദ്യങ്ങൾ മനസ്സിൽ പൊങ്ങി വരും. പക്ഷേ, എന്തെഴുതാൻ ശ്രമിച്ചാലും ശ്രീകുമാരൻ തമ്പി എന്ന പ്രതിഭയുടെ ബഹുമുഖങ്ങളാണ് മനസ്സിലേക്ക് കടന്നുവരുന്നത്. എങ്കിലും അറുപത് വർഷത്തിലേക്ക് കടക്കാൻ ഇനി അധികമൊന്നും ദൂരമില്ലാത്ത തമ്പിയുമായുള്ള സൗഹൃദത്തിൽ നിന്ന് ചിലത് മാത്രം കുറിക്കുന്നതാവും ഉചിതം. ആയിരത്തിത്തൊള്ളായിരത്തി അറുപതുകളുടെ മധ്യത്തിലായിരിക്കാം മെരിലാന്റ് സ്റ്റുഡിയോയിൽ വെച്ച് ശ്രീകുമാരൻ തമ്പിയെ ആദ്യം കാണുന്നത്. "പുതിയ സിനിമയിൽ പാട്ടെഴുതാൻ വന്ന ആളാണ് ' എന്ന് പറഞ്ഞ് നിർമാതാവും സംവിധായകനുമായ പി. സുബ്രഹ്മണ്യമാണ് തമ്പിയെ എനിക്ക് പരിചയപ്പെടുത്തി തന്നത്. ഗാനരചയിതാക്കളായി വയലാറും പി. ഭാസ്കരനും ഒ.എൻ. വിയുമെല്ലാം നിറഞ്ഞുനിൽക്കുന്ന കാലത്താണ് സിനിമയിൽ ശ്രീകുമാരൻ തമ്പി എന്ന പാട്ടെഴുത്തുകാരന്റെ കടന്നുവരവ്.

കവിതയുടെയും പാട്ടിന്റെയും മൂന്ന് മഹാപ്രതിഭകൾക്കിടയിൽ ശ്രീകുമാരൻ തമ്പിയിലെ എഴുത്തുകാരന്റെ സ്വരം വേറിട്ടതായിരുന്നു. ഞാനഭിനയിച്ച ഒട്ടനവധി ചിത്രങ്ങൾക്ക് വേണ്ടി അദ്ദേഹം പാട്ടെഴുതി. ആ പാട്ടുകളെല്ലാം ഇന്നും മാഞ്ഞുപോവാതെ മലയാളിയുടെ മനസ്സിലുണ്ട്. എങ്കിലും മഹാരഥന്മാർക്കിടയിൽ അർഹിക്കുന്ന അംഗീകാരങ്ങൾ അക്കാലത്ത് തമ്പിയ്ക്ക് ലഭിക്കാതെ പോയി എന്നെനിക്ക് പലപ്പോഴും തോന്നിയിട്ടുണ്ട്. എങ്കിലും വലിയ സങ്കടം തോന്നിയ കാര്യം ശ്രീകുമാരൻ തമ്പി എഴുതിയ അനശ്വരഗാനങ്ങളിൽ പലതും മറ്റു പലരുടെയും പേരുകളിൽ മലയാളി വായിച്ചുവെന്നതാണ്.