പാട്ടെഴുത്തിലെ End Point

പാട്ടെഴുതുന്നവർ, പാട്ടെഴുതാൻ ആഗ്രഹിക്കുന്നവർ നിർബന്ധമായും വായിച്ചിരിക്കേണ്ട പാഠപുസ്തകമാണ് ശ്രീകുമാരൻതമ്പി

-  ബി.കെ ഹരിനാരായണൻ

രസതന്ത്രം ഒരു വിഷയമായെടുത്ത്, പ്ലസ് ടുവിനോ  പ്രീഡിഗ്രിക്കോ യൂജിക്കോ പീജിക്കോ പഠിച്ചവരെല്ലാം തന്നെ പ്രാക്ടിക്കൽ ലാബിൽ ടൈട്രേഷൻ എക്സ്പിരിമെന്റ് ചെയ്തിട്ടുണ്ടാകും. ഒരു സൊലൂഷന്റെ വോള്യം കണ്ടുപിടിക്കുന്നതിനുള്ള പരീക്ഷണമാണിത്. ഈ സൊലൂഷൻ, ബ്യൂററ്റ് എന്ന നീണ്ട കുഴലുപോലെയുള്ള ഉപകരണത്തിൽ നിറയ്ക്കുന്നു. അതിനുശേഷം, വോള്യം കണക്കാക്കപ്പെട്ടിട്ടുള്ള, ഒരു നിശ്ചിത അളവ് ആസിഡ്, കോൺ ആകൃതിയിലുള്ള, എറിൻമേയർ ഫ്ലാസ്ക് എന്ന പാത്രത്തിലെടു ക്കുന്നു, കുറച്ച് തുള്ളികളായി, മറ്റൊരു പദാർഥവും (ഇൻഡിക്കേറ്റർ) അതിൽ ചേർക്കുന്നു. പിന്നെ പരീക്ഷണം തുടങ്ങുന്നു.

ഫ്ലാസ്കിലെ ലായനിയിലേക്ക് ഓരോ തുള്ളിയായി, ബ്യൂററ്റിൽ നിന്ന് സൊല്യൂഷൻ, ഫ്ലാസ്കിലേക്ക് വീഴ്ത്തും. ഒരു നിശ്ചിത പോയന്റിലെത്തുമ്പോൾ, ഫ്ലാസ്കിലെ ലായനിയുടെ നിറം മാറാൻ തുടങ്ങും. മാറാൻ തുടങ്ങുന്ന പോയന്റിൽ നിർത്തണം. അതാണ് ലിറ പോയന്റ്. നിറംമാറ്റം സംഭവിക്കുന്നതിന് തൊട്ടുമുൻപ് നിർത്താൻ പാടില്ല. എന്നാൽ നിറം മാറിയശേഷം ഒരു നെല്ലിടപോലും മുന്നോട്ട് പോകാനും പാടില്ല.

ഒരു എൻജിനീയർ കൂടിയായതു കൊണ്ടാവണം പാട്ടെഴുത്തിന്റെ, അതിസങ്കീർണമായ പ്രണയപ്പാട്ടെഴുത്തിന്റെ, end point കൃത്യമായി അറിയുന്ന എഴുത്തുകാരനാണ് തമ്പിസാർ. മനസ്സിന്റെ ബ്യൂററ്റിൽ നിന്ന് തുള്ളിമുറിയാതെ ഉതിരുന്ന വാക്കുകൾ, പ്രണയവും കവിതയും കല്പനയും കലർന്ന ലായനിയിലേ ക്ക് കലരുമ്പോൾ ഒരിക്കൽപോലും അദ്ദേഹത്തിന്റെ കയ്യിൽനിന്ന് പാട്ടിന്റെ end point' മാറിപ്പോ കാറില്ലെന്ന് തോന്നിയിട്ടുണ്ട്. ആ പാട്ടുകളിൽ സുന്ദരമായ കവിതയും കല്പനയുമുണ്ടാകും, എന്നാൽ അത്രമേൽ ലളിതവും ജനകീയവുമാകും. അതിരില്ലാത്ത പ്രണയമുണ്ടാകും. എന്നാൽ അത് ഒരിക്കലും ശൃംഗാരത്തിലേക്കോ സംഭോഗം ശൃംഗാരത്തിലേക്കോ തലം മാറിപ്പോകില്ല. സ്നേഹവും ബഹുമാനവുമുണ്ടാകും. എന്നാൽ ആ പ്രണയി ഒരിക്കലും ദൂരെ മാറിനിൽക്കുന്നയാളുമാകില്ല. അകലെയുള്ള നീലാകാശംവരെ അലതല്ലുന്ന മേഘതീർത്ഥമായി പ്രണയം പരന്നുകിടക്കുന്നു. കസ്തൂരി മണക്കുന്ന കാറ്റാവുന്നു, നിർമലമായ നീരാളമാവുന്നു...