எட்டும் தூரத்தில், சொர்க்கம்...!

கல்யாண விசயம் பேச்சு வார்த்தையெல்லாம் முடிந்து அப்போழுதுதான் மாப்பிள்ளை வீட்டுக்காரர்கள் கிளம்பியிருந்தார்கள். சோமசுந்தரத்திற்கும், யுவராணிக்கும் ஏகப்பட்ட மகிழ்ச்சி மனம் முழுவதும் ஆக்கிரமித்திருக்க, மகள் சர்ப்பனா மனசு மட்டும் கொதிநீரால் வெந்து கொண்டிருந்தது.

- பால் கண்ணன்

அப்பா அம்மா முன்னாடி போலி புன்னகையை காட்டி நடிக்க, சற்று நேரத்தில் அனுமதிபெறாமல் புயல் வேகத்தில் தன் அறைக்குள் புகுந்து கண்ணாடியை ஒரு முறைப்போடு முறைத்து கட்டிலில் உட்கார்ந்து கொண்டு ஆழ்ந்த யோசனையில் இருந்தாள்.

உடனே செல்போனை எடுத்து யாரையோ அவசரமாக அழைத்தாள்.

ஹாலில் சர்ப்பனாவின் அப்பா, அம்மா மாப்பிள்ளையைப் பற்றி புகழ்ந்து பேசி, மகிழ்ந்து கொண்டார்கள்.

"பையன் ரொம்ப ஸ்மார்ட்டா இருக்கான். சாப்டான முகம். அவன் உட்கார்ந்திருந்த விதத்தை கவனிச்சீங்களா? சோபாவுல முழுசா சாயாம, மரியாதை நிமித்தமா இருந்ததை. அவனோட பார்வையில் எத்தனை கண்ணியம். நம்ம பொண்ணை ரொம்ப நேரமாபார்க்கலை. ரொம்ப நேரம் பார்ப்பதை தவிர்த்த காரணம், நாமெல்லாம் பக்கத்துல இருக்கற கூச்சம்தான். அதனால எனக்கு இந்தப்பையனை ரொம்ப பிடிச்சிருக்கு. எப்படியாவது நம்ம பொண்ணுக்கு இவனை பேசி முடிச்சிடலாம்." என்றாள் யுவராணி மலர்ச்சியுடன்.