മ്യൂച്വൽ ഫണ്ടുകൾ നിക്ഷേപകരെ കബളിപ്പിക്കുന്ന വഴികൾ

മ്യൂച്വൽ ഫണ്ട് കമ്പനികളും മാനേജർമാരും പല രീതിയിലും നിക്ഷേപകരെ ചതിക്കുകയും കബളിപ്പിക്കുകയും ചെയ്യും. ഈ ചതിക്കുഴികൾ മനസ്സിലാക്കിയിരുന്നാൽ നഷ്ടങ്ങൾ ഒഴിവാക്കാം.

- അനീഷ് ദേവസ്യ

കഴിഞ്ഞ മേയ് അവസാനം ആക്സിസ് അസറ്റ് മാനേജ്മെന്റ് കമ്പനി രണ്ടു മാനേജർമാരെ പുറത്താക്കിയിരുന്നു. ഫ്രണ്ട് റണ്ണിങ് ആരോപിച്ചാണ് പുറത്താക്കിയത്. നിക്ഷേപകരെ കരുവാക്കി ഫണ്ട് മാനേജർമാർ സ്വയം ലാഭം ഉണ്ടാക്കുന്ന പ്രവൃത്തിയാണ് ഫ്രണ്ട് റണ്ണിങ് എന്നതുകൊണ്ട് ഉദ്ദേശിക്കുന്നത്. ഇതുപോലെ മ്യൂച്വൽ ഫണ്ട് കമ്പനികളും മാനേജർമാരും പലരീതിയിലും നിക്ഷേപകരെ ചതിക്കുകയും കബളിപ്പിക്കുകയും ചെയ്യും. ചിലത് നിയപരമായി കുറ്റകൃത്യമാണ്. മറ്റു ചിലത് ധാർമികമായ തെറ്റാണെന്നു മാത്രമേ പറയാൻ കഴിയൂ.

എന്താണ് ഫ്രണ്ട് റണ്ണിങ്?

ഫണ്ട് മാനേജർ ഒരു നിക്ഷേപം നടത്തുന്നത് വിശദമായ പഠനങ്ങൾക്കും ചർച്ചകൾക്കും ചിന്തനങ്ങൾക്കും ശേഷമാണ്. വലിയൊരു മ്യൂച്വൽ ഫണ്ട് ഒരു കമ്പനിയുടെ ഓഹരിയിൽ അനേകായിരം കോടി രൂപയായിരിക്കാം നിക്ഷേപിക്കുന്നത്. ഇത്തരത്തിൽ വലിയൊരു നിക്ഷേപം നടത്തുമ്പോൾ ആ ഓഹരിയുടെ വിലയിൽ വലിയ വർധന ഉണ്ടായേക്കാം.