25,000 രൂപ നിക്ഷേപത്തിൽ 4 പേർക്ക് സ്ഥിരവരുമാനം

 വായ്പ എടുത്തു തുടങ്ങിയ ഗാർമെന്റ് യൂണിറ്റ് പൂട്ടേണ്ടി വന്നപ്പോൾ ജോബ് വർക്കിലേക്കു ചുവടുമാറ്റി പിടിച്ചുനിന്നു മുന്നേറുന്ന നാലു വനിതകൾ.

കൂലിപ്പണിയെടുത്തു ജീവിക്കുന്ന കുടുംബങ്ങൾക്ക് അത്താണിയായ നാലു വനിതകളുടെ കഥയാണിത്. അൽപം തുന്നൽ അറിയാമായിരുന്നു. അതുകൊണ്ട് ഒരു ബിസിനസ് ചെയ്യാൻ തീരുമാനിച്ചു. പാലക്കാട് ജില്ലയിലെ വടവന്നൂരിൽ സായൂജ്യം ടെയ്ലറിങ് എന്ന പേരിലാണ് സംരംഭം. വി. സുഭദ്രയുടെ നേതൃത്വത്തിലാണു ബിസിനസ്.

മുടക്കിയത് ഒരു ലക്ഷം രൂപ

ഒരു ലക്ഷം രൂപയോളം മുടക്കി . നാലു തയ്യൽമെഷീനുകൾ വാങ്ങി. ബ്ലോക്ക് പഞ്ചായത്ത് പദ്ധതിയിൽ ബാങ്ക് വായ്പ എടുത്തതിനാൽ മൂന്നിൽ ഒന്ന് സബ്സിഡിയും കിട്ടി. റെഡിമെയ്ഡ് വസ്ത്രങ്ങൾ ഉണ്ടാക്കി വിൽക്കുക എന്ന ലക്ഷ്യത്തോടെ ഗാർമെന്റ് യൂണിറ്റ് ആരംഭിച്ചു. പക്ഷേ, ഏറെനാൾ മുന്നോട്ടു പോയില്ല. ക്രെഡിറ്റ് നൽകേണ്ടി വന്നതും പണം പിരിഞ്ഞുകിട്ടാൻ വൈകിയതും മൂലം മുന്നോട്ടു പ്രവർത്തിക്കുവാൻ മൂലധനം ഇല്ലാതായതാണ് കാരണം. നഷ്ടത്തിന്റെ തോതു കൂടിയപ്പോൾ ബിസിനസ് അവസാനിപ്പിക്കാൻ നിർബന്ധിതരായി. പക്ഷേ, വായ്പത്തുക എങ്ങനെ അടച്ചു തീർക്കുമെന്നത് മുന്നിൽ വലിയ ചോദ്യമായി. അതിനു പരിഹാരമായി പല വഴികളും അന്വേഷിച്ചു. അവസാനം കണ്ടെത്തിയ വഴിയാണ് ജോബ് വർക്സ്.

കൊടുവായൂരിലെ കച്ചവടക്കാരൻ