സുരക്ഷിത നിക്ഷേപങ്ങൾ മികച്ചത് ഏത്?

സ്ഥിരനിക്ഷേപം, സ്വർണം, കോർപറേറ്റ് ഡിപ്പോസിറ്റ് എന്നിവയിലെല്ലാം സുരക്ഷിതമായി ഉയർന്ന വരുമാനം നേടാനുള്ള വ്യത്യസ്തമായ സാധ്യതകളുണ്ട്.

- അരുൺ എസ്. വിജയ്

ഡെറ്റ് ഫണ്ടിലെ ദീർഘകാല നിക്ഷേപത്തിനു ണ്ടായിരുന്ന ഇൻഡക്സേഷൻ ബെനിഫ്റ്റ് ഇല്ലാതായതോടെ സുരക്ഷിതമായി ന്യായമായ ആദായം നേടാനുള്ള നല്ലൊരു അവസരം കൂടി നിക്ഷേപകർക്കു മുന്നിൽ അടഞ്ഞിരിക്കുന്നു. ഈ സാഹചര്യത്തിൽ വലിയ റിസ്ക് എടുക്കാതെ പരമാവധി ആദായം എടുക്കാൻ എവിടെ എങ്ങനെ നിക്ഷേപിക്കാം എന്ന് അന്വേഷിക്കുന്നവർ ഏറെയാണ്. അത്തരം മൂന്ന് അവസരങ്ങളെക്കുറിച്ചു മനസ്സിലാക്കാം.

1. ബാങ്ക് നിക്ഷേപം പണപ്പെരുപ്പം നിയന്ത്രിക്കാനായി റിസർവ് ബാങ്ക് പലിശ ഉയർത്തിയതോടെ ബാങ്കുകളും നിക്ഷേപപലിശ കൂട്ടിയിരിക്കുന്നു. പല ബാങ്കുകളും ഉയർന്ന നിരക്കിൽ പ്രത്യേക കാലാവധി നിക്ഷേപങ്ങൾ സ്വീകരിക്കുന്നുണ്ട്.

സ്റ്റേറ്റ് ബാങ്ക് ഓഫ് ഇന്ത്യ 400 ദിവസ അമൃത് കലാഷ് നിക്ഷേപത്തിന് 7.29% പലിശ കൊടുക്കുന്നു. (മുതിർന്നവർക്ക് 7.60% വരെ). പദ്ധതി 2023 ജൂൺ 30 വരെ ലഭ്യമാണ്.

ഫെഡറൽ ബാങ്ക് 15 മുതൽ 24 മാസം വരെ 7.25% നൽകുന്നു. മുതിർന്ന പൗരന്മാർക്ക് 7.75% കാലാവധി പൂർത്തിയാക്കുംവരെ പിൻവലിക്കാനാകാത്ത നിക്ഷേപത്തിന് 0.25% കൂടുതൽ കിട്ടും.

ഇപ്പോൾ നിക്ഷേപിക്കണോ?

 കോവിഡ് പോലുള്ള മഹാമാരി, ബാങ്ക് തകർച്ച, പ്രളയം, വരൾച്ച, രാജ്യങ്ങൾക്കിടയിലെ യുദ്ധം തുടങ്ങിയ സംഭവിച്ചില്ലെങ്കിൽ ഇനി പരമാവധി അര- മുക്കാൽ ശതമാനം പലിശ വർധന സാധ്യതയുള്ളൂ എന്നു വിലയിരുത്താം. അതിനാൽ, 5 വർഷത്തിനു മുകളിലുള്ള നിക്ഷേപങ്ങൾ നടത്താൻ ഈ സന്ദർഭം ഉപയോഗിക്കാം. അതിലൂടെ ബാങ്ക് നിക്ഷേപങ്ങൾക്ക് 6.50% ആദായം നേടാം. മുതിർന്നവർക്ക് 7.50% വരെയും.

മുഴുവൻ നിക്ഷേപവും സുരക്ഷിതമാക്കാം

ആഗോളതലത്തിലെ ബാങ്ക് തകർച്ച ഇവിടെയും ബാങ്ക് നിക്ഷേപത്തിന്റെ സുരക്ഷയെക്കുറിച്ച് ആശങ്കയുണ്ടാക്കാം. ഇവിടെ റിസർവ് ബാങ്ക് ലൈസൻസ് ഉള്ള ബാങ്കിലെ നിക്ഷേപത്തിന് 5 ലക്ഷം രൂപ വരെ ഗാരന്റിയുണ്ട്. അതിനാൽ, ഒരു ബാങ്കിൽ 5 ലക്ഷം രൂപ വരെ മാത്രം നിക്ഷേപിക്കുക. കൂടുതലുള്ള സംഖ്യ 5 ലക്ഷം വീതം മറ്റു ബാങ്കുകളിൽ നിക്ഷേപിച്ചാൽ ബാങ്ക് തകർന്നാലും നിങ്ങളുടെ നഷ്ടസാധ്യത പൂർണമായും ഇല്ലാതെയാക്കാം.

ആദായനികുതി ബാധ്യത -

ഒരു സാമ്പത്തികവർഷം 10,000 രൂപ വരെയുള്ള ബാങ്ക് നിക്ഷേപ പലിശയാണ് ആദായനികുതിയിൽനിന്ന് ഒഴിവാക്കിയിരിക്കുന്നത്. അതിൽ കൂടുതൽ കിട്ടുന്ന പലിശയ്ക്കു നിക്ഷേപകന്റെ നികുതി സ്ലാബ് അനുസരിച്ചു നികുതി കൊടുക്കണം.