സ്വർണം കുതിക്കുന്നു ഇപ്പോൾ വാങ്ങണോ വിൽക്കണോ?

മൂന്നു മാസംകൊണ്ട് 15% കുതിപ്പ് രേഖപ്പെടുത്തിയതോടെ സ്വർണം വിൽക്കണോ, വാങ്ങണോ എന്ന സംശയത്തിലാണ് സാധാരണക്കാർ.

സ്വർണത്തിൽ നിക്ഷേപമുള്ളവരെപ്പോലെ ആഹ്ലാദിക്കുന്നവർ ഇപ്പോൾ മറ്റാരുമുണ്ടാകില്ല. ഏപ്രിലിൽ മാത്രം പവന് കൂടിയത് 3,840 രൂപ. 2024ൽ ഏറ്റവും മികച്ച പ്രകടനം കാഴ്ചവയ്ക്കുന്ന നിക്ഷേപം എന്ന പദവിയും ഇപ്പോൾ അലങ്കരിക്കുന്നത് മഞ്ഞലോഹംതന്നെ.

കഴിഞ്ഞ മൂന്നുമാസംകൊണ്ട് 20 ശതമാനത്തോളം വർധന സ്വർണം രേഖപ്പെടുത്തിയപ്പോൾ ഓഹരി വിപണിയിൽ സെൻസെക്സ് രേഖപ്പെടുത്തിയത് ഏതാണ്ട് ഒരു ശതമാനം നേട്ടം മാത്രം. ഇടയ്ക്ക് ചെറിയ തിരുത്തലൊക്കെ ഉണ്ടെങ്കിലും വർഷാരംഭത്തിൽ തുടങ്ങിയ സ്വർണക്കുതിപ്പ് ഇപ്പോഴും തുടരുകയാണ്. ഏതാണ്ട് സമാനനേട്ടം നൽകി തൊട്ടുപിന്നിലായി വെള്ളിയും ഉണ്ട്.

വിലകുതിക്കാൻ പല കാരണങ്ങൾ

നിലവിലെ സാഹചര്യത്തിൽ രണ്ടു പ്രഷ്യസ് മെറ്റൽസിന്റെയും വില ഇനിയും കൂടുമെന്നാണ് ലോകമെമ്പാടുമുള്ള വിദഗ്ധരുടെ വിലയിരുത്തൽ. അനിതരസാധാരണമായ ഈ സ്വർണക്കുതിപ്പിനു കളമൊരുക്കിയത് പല ഘടകങ്ങളാണ്. പണപ്പെരുപ്പം ഉയർന്ന നിലയിൽ തുടരുന്നതിനൊപ്പം വിവിധ രാജ്യങ്ങൾക്കിടയിൽ ഉടലെടുത്ത സംഘർഷാവസ്ഥയാണ് പ്രധാന കാരണം.

രാജ്യങ്ങൾ തമ്മിൽ ചെറുസംഘർഷങ്ങൾ ഉടലെടുത്താൽ പോലും സ്വർണവില ഇനിയും റോക്കറ്റുപോലെ കുതിക്കാം. കേന്ദ്ര ബാങ്കുകൾ തന്നെ വൻതോതിൽ സ്വർണം വാങ്ങുന്നതാണ് ഡിമാൻഡും വിലയും കുതിക്കാൻ മറ്റൊരു കാരണം. പ്രധാന ഉപഭോഗ രാജ്യങ്ങളായ ഇന്ത്യയിലും ചൈനയിലും ഡിമാൻഡ് വർധിക്കുന്നത് റീട്ടെയിൽ തലത്തിലും വിലവർധനയ്ക്ക് ആക്കംകൂട്ടുന്നു.

ചൈനയിലെ റിയൽ എസ്റ്റേറ്റ് മാന്ദ്യം മൂലം ചെറുകിടക്കാരും സ്വർണത്തിൽ കൂടുതലായി നിക്ഷേപിക്കുന്നുണ്ട്. ഡോളർ ആശ്രയത്വം കുറയ്ക്കാൻ (ഡീ ഡോളറൈസേഷൻ), ലോകരാഷ്ട്രങ്ങൾ സ്വർണറിസർവ് ഉയർത്തുകയാണ്. പ്രത്യേകിച്ച് ചൈന. ഡോളറിനെതിരെ രൂപ വീണ്ടും ദുർബലമാകുന്നതും ഇന്ത്യയിൽ സ്വർണവില കൂട്ടുന്നു.

ഇപ്പോൾ വാങ്ങണോ, വിൽക്കണോ?