സിബിലും ക്രിമിനലും

അമ്പു കൊള്ളാത്തവരില്ല കുരുക്കളിൽ എന്നു പറഞ്ഞപോലെ തെറ്റായ ക്രെഡിറ്റ് സ്കോർ മൂലം പൊറുതിമുട്ടാത്തവരുമില്ല

- കെ.കെ.ജയകുമാർ പ്രമുഖ ഫിനാൻഷ്യൽ ജേണലിസ്റ്റും ഇൻഫർമേഷൻ പബ്ലിക് റിലേഷൻസ് വകുപ്പിൽ ഉദ്യോഗസ്ഥനുമാണ് ലേഖകൻ jayakumarkk@gmail.​com

ക്രെഡിറ്റ് സ്കോറിനെക്കുറിച്ചുള്ള സുഹൃത്തിന്റെ സംശയങ്ങൾക്കു പരിഹാരം പറഞ്ഞ് ഒന്നു സ്വസ്ഥമായപ്പോഴാണ് എതിർ സീറ്റിലിരുന്ന ഒരു സ്ത്രീ എന്നെ പുച്ഛത്തോടെ നോക്കുന്നതു കണ്ടത്. അവർ എന്നോടു ചോദിച്ചു.

“എന്തിനാ ഈ ബാങ്കുകളുടെ പുറകേപോകുന്നത്. അതുകൊണ്ടല്ലേ ക്രെഡിറ്റ് സ്കോറും മറ്റും പറഞ്ഞ് അവർ നമ്മുടെ മുതുകത്തു കേറുന്നത്. ഞാൻ പറഞ്ഞു: “മാഡം പറയുന്നതു സത്യമാണ്. പക്ഷേ, വായ്പയില്ലാതെ ഇന്ന് ആർക്കും ജീവിക്കാൻ പറ്റില്ലല്ലോ.' "വായ്പയെടുക്കരുത് എന്ന് ആരു പറഞ്ഞു? എത്രയോ സൊസൈറ്റികളുണ്ട് നാട്ടിൽ. നിങ്ങളൊരു ശമ്പളവരുമാനക്കാരനാണെങ്കിൽ എംപ്ലോയീസ് ക്രഡിറ്റ് സൊസൈറ്റിയുണ്ടാകും. നാട്ടിൽ സർവീസ് സഹകരണ സൊസൈറ്റികളുണ്ടാകും. പോരെങ്കിൽ ചിട്ടിയിൽ ചേർന്നാൽ പോരെ.