વિવેચનકાર ભૂપત વડોદરિયાની ‘પરખ’

ભૂપતભાઈ સર્જકની કૃતિને પૂરો ન્યાય આપવાનો પ્રયાસ કરે છે ત્યારે સાથોસાથ પોતાની ન હયાતીમાં ઉપેક્ષાનો શિકાર બનેલા સર્જકના મનોવ્યાપારને સમજવાનો અને સમજાવવાનો પ્રયાસ એ ભૂપતભાઈની વિશેષતા છે અને એટલે કોઈએ લેખકની મૂળ કૃતિ વાંચી ન હોય તો પણ ભૂપતભાઈનો વિવેચનલેખ વાંચવામાં વાચકને રસ પડે છે

- તરુણ દત્તાણી

ઓગણીસ ફેબ્રુઆરી. સમભાવ મીડિયા જૂથના સંસ્થાપક ભૂપત વડોદરિયાની ૯૪મી જયંતી. લેખક, પત્રકાર અને ચિંતક ભૂપતભાઈથી લગભગ બધા પિરિચત છે. તેમની સાહિત્ય કૃતિઓ અને ચિંતનાત્મક નિબંધોનું આકંઠ પાન કરનારાઓનો વર્ગ વિશાળ છે, પરંતુ વિવેચક ભૂપત વડોદરિયા વિશે આપણે બહુ ઓછું જાણીએ છીએ. તેનું કારણ છે, વિવેચનનું કહી શકાય એવું તેમનું એક જ પુસ્તક આપણને મળ્યું છે અને તે છે, ‘પરખ’. તેના પ્રકાશનને ત્રણ દાયકાથી વધુ સમય વીતી ગયો છે અને આજે એ અપ્રાપ્ય છે. એ પુસ્તકની પ્રસ્તાવનામાં તેમણે ‘પરખ’નો બીજો ભાગ આપવાનો વાયદો કર્યો હતો, પરંતુ એ શક્ય બન્યું નહીં.