એક અનોખો નાટ્યોત્સવ ઓલ અબાઉટ નાટક

શહેરમાં આવેલા પ્રતિષ્ઠિત થિયેટર અને મીડિયા સેન્ટર (ટીએમસી) દ્વારા ઑલ અબાઉટ નાટક ફેસ્ટિવલ-૨૦૨૩નું ભવ્ય આયોજન થયું છે. લાગલગાટ બાવીસ દિવસ સુધી ચાલનારા આ મહોત્સવમાં રંગમંચની શ્રેષ્ઠ કૃતિઓનું પ્રદર્શન થશે અને થિયેટર રસિકો તેને માણી શકશે. ટીએમસી દ્વારા અનેક વૈવિધ્યપૂર્ણ નાટકો, પર્ફોર્મન્સીસ અને સંવાદોથી ધમધમતું આટલું મોટું આયોજન પહેલીવાર થયું છે.

- આર્જવ પારેખ

આમ જોવા જઈએ તો અમદાવાદ એટલે સતત સાહિત્યિક, રંગમંચ, શિક્ષણ વગેરે જેવી પ્રવૃત્તિઓથી ધમધમતું કેન્દ્ર, જ્યાં કાયમ કંઈક નવીન આયોજનો થતાં રહે. તાજેતરમાં જ ઉપાસના સ્કૂલ ઓફ પર્ફોર્મિંગ આર્ટ્સ ખાતે ‘અભિવ્યક્તિ’નું આયોજન થયું હતું. હવે અમદાવાદના ન્યૂ રાણીપ ખાતે આવેલા થિયેટર અને મીડિયા સેન્ટરમાં ‘ઑલ અબાઉટ નાટક’ ફેસ્ટિવલ-૨૦૨૩નું આયોજન કરવામાં આવ્યું છે. ૫મી માર્ચથી શરૂ થયેલા મહોત્સવમાં અલગ-અલગ દિવસોએ વિશિષ્ટ કાર્યક્રમોનું આયોજન છે જે છેક ૨૭ માર્ચ સુધી ચાલશે. ખૂબ પ્રખ્યાત હોય એવી થિયેટરની કૃતિઓ, તદ્દન નવા જ પર્ફોર્મન્સ, પેનલ ડિસ્કશન ’ને ગુજરાતી નાટકોના ઇતિહાસ અને વિકાસ પરનું પ્રદર્શનનું આયોજન થયું છે. અમુક આયોજનો ફ્રી છે, જ્યારે બીજા પર્ફોર્મન્સ માટે ટિકિટની વ્યવસ્થા કરવામાં આવી છે.