સમીર ખખ્ખર: 'ખોપડી'ના પાત્રએ છેવટ સુધી તેમનો પીછો ન છોડ્યો

‘નુક્કડ’ ઉપરાંત ‘સર્કસ’ અને ‘શ્રીમાન શ્રીમતી’ જેવી સિરિયલ; ‘પુષ્પક’, ‘પરિન્દા’, ‘હંસી તો ફંસી' અને ‘જય હો’ જેવી અઢળક ફિલ્મો કરી ચૂકેલા સમીર ખખ્ખર ગુજરાતી રંગભૂમિ સાથે નિકટતાથી જોડાયેલા હતા

- પાર્થ દવે

હિન્દી સિરિયલો, ફિલ્મો તથા ગુજરાતી રંગભૂમિના અદાકાર સમીર ખખ્ખરનું ૧૫મી માર્ચે નિધન થયું. લોકો તેમને દૂરદર્શનની ધારાવાહિક ‘નુક્કડ’ના પાત્ર ‘ખોપડી’ માટે આજે પણ યાદ કરે છે. કુંદન શાહ અને સઇદ અખ્તર મિર્ઝા દિગ્દર્શિત દૂરદર્શન પર આવતી સિરિયલ ‘નુક્કડ’નાં પાત્રો આ પ્રમાણે હતાં: ગુરુ, કાદેરભાઈ, હરિ, ખોપડી, રાજા, કુંદુ મોચી, કરીમ હજામ, રાધા - આ બધાં નામો લોકોને આજે પણ યાદ છે. સૌને ગમતા દારૂડિયા ખોપડીનું પાત્ર અભિનેતા સમીર ખખ્ખરે ભજવ્યું હતું, જેમનું ગયા અઠવાડિયે - ૧૫મી માર્ચે મૃત્યુ થયું.