જીભી, અ પેસ્ટોરલ હેમલેટ ઇન હિમાચલ પ્રદેશ..

જીભી એટલું રૂપાળું છે કે તેને હિમાલયન નેસડું કહેવાની છૂટ લઈ શકાય એવું છે. અહીં દેવદારનાં જંગલો છે; દેવદારનાં લાકડાંમાંથી બનાવેલાં મેડીબંધ ઘરો છે; ઘરો આસપાસ ખેતરો છે

- રક્ષા ભટ્ટ

ભારતીયોને ઉનાળાની ગરમીથી છૂટવા માટે ક્યાં ભાગી જવું એની પસંદગી કરવી અઘરી નથી, કારણ કે આપણી પાસે મધ્ય હિમાલયમાં સ્થિત એવી ખીણો છે જ્યાં નદીઓ છે; વૃક્ષાચ્છાદિત ટેકરીઓ છે; દૂર દેખાતી બરફાળ પર્વતમાળાઓ છે અને છે ગ્રામ્ય જીવનથી જીવંત નેસડા પણ. હિમાચલની તિર્થન વેલીમાં આવેલું જીભી આવું જ એક પેસ્ટોરલ હેમલેટ છે.

પ્રવાસન જગતમાં આ જીભીનો ઉલ્લેખ હિમાચલના બેસ્ટ કેપ્ટ સિક્રેટ તરીકે થતો હતો, કારણ કે થોડાં વર્ષો પહેલાં સુધી જીભી પ્રવાસીઓની જીભે ચડેલું નામ નહોતું. હવે બ્લોગ-વ્લોગ અને સોશિયલ મીડિયા શેરિંગને કારણે જીભી તરફનો પ્રવાહ વધ્યો છે. તેમ છતાં એટલો નહિ કે જીભી પહોંચ્યા પછી સાંજ સુધીમાં એવું કહેવા પર મજબૂર થઈ જઈએ કે યાર, અહીં ક્યાં આવ્યા.

સાડા ચાર હજાર ફૂટની ઊંચાઈ પર આવેલું મધ્ય હિમાલયનું જીભી બંજારા વેલીનું હરિયાળું પ્રવેશદ્વાર છે. કુલ્લુ જિલ્લાના બંજારા તાલુકામાં સ્થિત જીભી ખડકો વચ્ચે થઈ વહેતી તિર્થન નદીના કિનારે આવેલું છે. જીભી એટલું રૂપાળું છે કે તેને હિમાલયન નેસડું કહેવાની છૂટ લઈ શકાય એવું છે. અહીં દેવદારનાં જંગલો છે; દેવદારનાં લાકડાંમાંથી બનાવેલાં મેડીબંધ ઘરો છે; ઘરો આસપાસ ખેતરો છે; બરફાચ્છાદિત વ્યૂની વિઝ્યુઅલ ટ્રીટ છે; સફરજનના બગીચાઓ છે; જ્યાં નજર નાખો ત્યાં ઘાસનાં ખુલ્લાં મેદાનો છે; દેવદારનાં વૃક્ષોમાંથી આવતી વુડી સ્મેલ છે અને સવાર-સાંજ વૉક લઈ શકાય એવી રસ્ટિક ટ્રેઇલ્સ પણ છે.

અહીં માર્ચથી નવેમ્બર સુધી હાઇકિંગબાયર્કિંગના શોખીનો અને મધ્ય હિમાલયમાં રહેવા ઇચ્છતા પ્રવાસીઓની અવર-જવર હોય છે. ડિસેમ્બર-જાન્યુઆરીમાં ઠંડીનો પારો શૂન્યની નીચે ઠરે છે, પરંતુ તેમ છતાં સાહસિકો તો વિન્ટર જીભીનો આનંદ પણ લે છે. અહીં સફરજનના બગીચાઓ વચ્ચે રહેલાં લાકડાંના કોટેજીસ છે. અહીં કથા-દંતકથાઓથી ઠંડક આપતું સેરોલસર સરોવર છે. અહીં જળધોધ છે. અહીં ભાત ભાતના પર્વતો અને લીલીછમ ટેકરીઓ છે. અહીં સેવન શેડ્સ ઑફ ગ્રીન તો ઇઝીલી અવેલેબલ છે અને અહીં ગ્રામ્ય જીવનનાં અનેક સંયોજનો આપણા મેમરી કાર્ડને એક્ટિવ મોડમાં રાખી શકે એમ છે.