એનસીપીમાં શરદ પવારના સ્થાને કોણ - સુપ્રિયા કે અજિત?

કોંગ્રેસના પ્રત્યાઘાત એવા હતા કે શરદ પવારની જાહેરાતથી મહાવિકાસ અઘાડી ગઠબંધન પર કોઈ અસર પડશે નહીં

મહારાષ્ટ્રના દિગ્ગજ રાજકીય નેતા શરદ પવારે બીજી મેના રોજ પોતાની આત્મકથાના લોકાર્પણ સમારોહમાં પોતાના પક્ષ નેશનાલિસ્ટ કોંગ્રેસ પાર્ટી (એનસીપી)નું અધ્યક્ષ પદ છોડવાની જાહેરાત કરીને ઉપસ્થિત સૌને ચોંકાવી દીધા હતા. તેમણે આ જાહેરાતની સાથે એવું પણ કહ્યું હતું કે, તેઓ હવે પછીથી કોઈ ચૂંટણી પણ લડશે નહીં. તેનો અર્થ તેઓ સક્રિય રાજકારણ છોડી રહ્યા છે એવો કરવામાં આવી રહ્યો છે. એનસીપીના મોટા ભાગના નેતાઓ અને કાર્યકરો શરદ પવાર તેમના આ નિર્ણય વિશે પુનઃ વિચારણા કરે અને નિર્ણય પાછો ખેંચે તેવો આગ્રહ કરી રહ્યા છે, ત્યારે પક્ષમાં વિદ્રોહી નેતાની છાપ ધરાવતા પવારના ભત્રીજા અજિત પવાર અને પ્રફુલ્લ પટેલના પ્રત્યાઘાત બીજા બધાથી તદ્દન જુદા પડતા હતા. અજિત પવારે એવું કહ્યું કે છે કે, શરદ પવારને તેમનો નિર્ણય પાછો ખેંચવા માટે દબાણ કરવું જોઈએ નહીં. પક્ષના અધ્યક્ષપદે જે કોઈ નવા નેતા આવશે તે શરદ પવારના માર્ગદર્શનમાં સારું કામ કરશે. પ્રફુલ્લ પટેલ પણ આવો જ અભિપ્રાય ધરાવે છે.