પોતાના કુટુંબ માટે આચારસંહિતા ઘડવી જોઈએ

સાથે હસીએ, સાથે રડીએ ’ને સાથે જમીએ જેવાં સાધારણ 'ને બિનજરૂરી દેખાતાં નીતિવાક્ય અસાધારણ ’ને આવશ્યક વખતમાં નોંધપાત્ર રીતે ઉપયોગી નીવડી શકે છે

- ગૌરાંગ અમીન

ગામ, દેશ ’ને વિશ્વ બંધારણ મુજબ જીવે એવું માને જે

કુટુંબ પોતાના ઘર માટે બંધારણ બનાવી ’ને પાળે તે

જીવન કેવી રીતે જીવવું જોઈએ તે માટે નિયમ, સિદ્ધાંત કે આદર્શ હોઈ શકે છે. ગંભીરતાથી વૈજ્ઞાનિક દ્રષ્ટિકોણ સાથે વિચારીએ તો જીવન વર્તમાન કરતાં વધારે ભવિષ્ય સાથે જોડાયેલી વિભાવના છે. માબાપ પોતાના કરતાં પોતાનાં બાળકોને વધુ મહત્ત્વ આપે છે. નાની ઉંમરે દરેકને અનુભવ ના મળ્યો હોય ’ને અવલોકન તેમ જ અભ્યાસ કરવાનો ખાસ અવકાશ ના મળ્યો હોય. વળી બાળકને અન્ય કોઈ સલાહ, સૂચન કે તાકીદ પ્રકારના વાક્ય ક્યારેક કહે એ પણ ઓછું ગમે છે. એમાં અડીઘડી કોઈનું કોઈ ટોકે એ કોને ગમે? રોજ કશું કહેવાનું પેરેન્ટ્સને પણ ના ગમે. તેના કરતાં જો સંતાનને જીવનમાં આગળ જતાં સતત માર્ગદર્શન આપે એવાં મુદ્રાલેખ, જીવનસૂત્ર યા ધ્યેયાત્મક વાક્ય સમજાવીને લખાવી દીધાં હોય તો એમને વાંધો ના પડે ’ને એ જાતે તેનો સમયોચિત ઉપયોગ કરી શકે. જો એ મોટોઝ યોગ્ય સમય પર કામમાં ના લેવાથી નુકસાન ગયું હોય તો એમને જાતે પાકું સમજાઈ જાય. ખરેખર તો અમુક માર્ગદર્શક વાક્ય આખા ઘર કે કુટુંબ માટે યુનિકલી યુઝફુલ બની શકે છે.