વેગનર ગ્રૂપનો વડો પ્રિગોઝિન પુતિનની નબળાઈ જાણી ગયો હતો

ચોવીસ ફેબ્રુઆરી, ૨૦૨૨ના રોજ માત્ર ગણતરીના દિવસોમાં યુક્રેન કબજે કરવાની સ્વેચ્છા અનુસાર આક્રમણ કરાયું. જે ધાર્યું હતું તે ન થયું અને નહોતું ધાર્યું તેવું થયું

જૂનના મધ્યમાં એ શક્યતા અને ધારણા હતી કે રશિયા યુક્રેન પર ઓછી ક્ષમતાનાં પરમાણુ શસ્ત્રો વા૫૨શે. એ માટેનું વાતાવરણ જામી રહ્યું હતું, પરંતુ તે પછી રશિયામાં ઘરઆંગણે બળવો જામ્યો. તે પ્રસંગોના પરિણામે અણુશસ્ત્રના ઉપયોગની શક્યતા ભલે સદંતર દૂર થઈ નથી, પણ સાવ ઘટી ગઈ છે. વ્લાદિમીર પુતિનના ખાસમખાસ યેવજેની પ્રિગોઝિને (પ્રિગોશન અને પ્રિગોશીન પણ કહેવાય છે) પોકારેલા બળવાના તુરંત કોઈ નાટ્યાત્મક પરિણામો આવ્યાં નથી. છતાં રશિયાની ધાકધડક, પુતિનની લોકપ્રિયતા, અલોકપ્રિયતા, આંતરિક કલહ અને ખટપટોનાં તમામ સમીકરણો ખુલ્લાં પડી ગયાં અને લોહી વહાવ્યા વગર (એવો દાવો થઈ રહ્યો છે) યુદ્ધનું ભવિષ્ય અને ગણિત બદલી નાખ્યા છે. બળવો બિનલોહિયાળ હતો એ વાત સાચી જણાતી નથી, છતાં પુતિન માટે એ લોહિયાળ હોય એટલો જ નુકસાનકા૨ક પુરવાર થયો છે.

એ જન્મથી જ સાથે ક્રિમિનલ માઇન્ડ લઈને આવ્યો હતો. થોડો મોટો થતાંની સાથે જ અવળા ધંધાઓ શરૂ કર્યા હતા. પુતિન રાજકીય ક્ષિતિજ પર ઊગે તે અગાઉ ૧૯૮૧માં વીસ વરસની ઉંમરે લૂંટ, છેતરપિંડી અને સગીર બાળકોને પ્રોસ્ટિટ્યૂશનના ધંધામાં ખેંચી જવા બદલ પ્રિગોઝિનને બાર વરસની સજા થઈ હતી. જેલમાંથી છૂટા થયા બાદ એણે હોટડોગ નામની એક વાનગીનો સ્ટોલ ખોલ્યો અને એકમાંથી અનેક સ્ટોલ્સની શૃંખલા શરૂ કરી. ફાસ્ટ-ફૂડ અને કૅટરિંગના ધંધામાં એણે અનેક અમલદારો, નેતાઓને મફતની સેવાઓ અને મિજબાનીઓ પૂરી પાડી અને વગદાર લોકો સાથેના સંપર્કોનું એક નેટવર્ક ઊભું કર્યું. તેના શિરપાવ રૂપે પ્રિગોઝિનને કૅટરિંગના મસમોટા કોન્ટ્રાક્ટ મળવા લાગ્યા. તેમાં રશિયાનાં લશ્કરી દળોને ખોરાક અને ખાદ્યસામગ્રીઓ પૂરી પાડવાનો પણ એક કોન્ટ્રાક્ટ હતો. એ સિલસિલામાં પુતિન સાથે મૈત્રી કેળવી લીધી હતી. બંનેનાં મગજ એકસરખી રીતે જ બદમાશ છે. તેથી મૈત્રી કુદરતી બની. પુતિન રશિયાના પ્રમુખ બન્યા તે સાથે ભાત-ભાતના ધંધામાં પ્રિગોઝિન અબજોપતિ બનતો ચાલ્યો. પુતિન ખાનગીમાં એના ભાગીદાર. પ્રમુખ સાથેની દોસ્તી ખાણીપીણીના ધંધામાંથી શરૂ થઈ હતી, તેથી ધનાઢ્ય બન્યો તો પણ આજે પુતિનના રસોઇયા તરીકે જ એ ઓળખાય છે.