રેવિશિંગ મોન્સૂન ઓન એન્ડ અરાઉન્ડ બાગા બીચ

કોંકણ રેલવેનો આનંદ ઉઠાવવો હોય તો ટ્રેનમાં મુસાફરી કરી અમદાવાદથી થિવિમ પહોંચવું ખર્ચાળ નથી. થિવિમ રેલવે સ્ટેશનથી બાગા અંદાજે ઓગણીસ કિલોમીટરનું જ અંતર છે

- રક્ષા ભટ્ટ

દર ચોમાસે વરસતા વરસાદે શહેરના ઓવર ક્રાઉડેડ વિસ્તારો પસાર કરીને વર્કિંગ પ્લેસ સુધી પહોંચતી વખતે એવું થાય છે કે પાંચેક દિવસ બધું છોડીને કોઈ સમુદ્ર કિનારે મિત્રો સાથે રહીએ અને વાતો કરતાં કરતાં બીચ સાઇડ ગ્રંચ વિથ રેઇનની મજા માણીએ કે પ્રિયજન સાથે બીચ પર ચાલીએ.

ચીલ કરો, બીકોઝ આપણે આપણી આવી ઇચ્છાને અંજામ આપવો હોય તો નોર્થ ગોવા ન બી એ પરફેક્ટ પ્લેસ ટુ ઑપ્ટ ફોર ઇન મોન્સૂન.

આમ જુઓ તો મેથી સપ્ટેમ્બર ગોવાની ઑફ સિઝન ગણાય છે. મેમાં ગોવામાં અસહનીય ગરમી હોય છે, જ્યારે મીડ જૂન સુધીમાં કેરલથી આવતું ચોમાસું ગોવાને અડી જાય છે અને છેક ઑક્ટોબર સુધી ગોવામાં રહે છે. મીડ જૂનથી ઑક્ટોબરના આ દિવસોમાં વર્ષાપ્રેમીઓ મોન્સૂન ગોવાના મૂડમાં અહીં પ્રવાસ કરે છે અને ખુદ ગોવાનીઝ લોકો પણ જૂનના અંતે સાઓ જોઆઓ પર્વ ઊજવી ફેની નામના સ્થાનિક મધાર્કની મજા લે છે.

વર્ષાઋતુમાં ગોવા ટ્રોપિકલ મોન્સૂન મોડમાં હોય છે અને મનમુકીને વરસે છે. દક્ષિણ-પશ્ચિમી વર્ષાઋતુનો વરસાદ મેળવતું ગોવા ઉષ્ણકટિબંધીય ઝોનમાં સ્થિત છે અને અરબી સમુદ્રની નજીક છે. ટ્રોપિકલ પેરેડાઇઝ ગણાતા ગોવામાં ઋતુઓની રાણી વર્ષાઋતુ પોતાનો લીલોછમ અસબાબ પાથરીને વર્ષાપ્રેમી પ્રવાસીઓને આકર્ષે છે. આ સમયે જળધોધ જીવતા થાય છે; નદીઓ ઉફાન પર હોય છે અને સેવન શેડ્સ ઑફ ગ્રીન આખાય ગોવાને પોતાના બાહુઓમાં લઈ વર્ષાગીતો ગાય છે. આ સમયે સમુદ્ર સ્નાન જોખમી હોય છે અને ગેસ્ટ હાઉસમાં પાવર કટનો પ્રોબ્લેમ ફેઇસ કરવો પડે છે. આથી નોર્થ ગોવાને આપણે આપણું મોન્સુન ડેસ્ટિનેશન બનાવીએ ત્યારે વધુ સગવડ ધરાવતો સ્ટે શોધીએ તો વરસતા વરસાદમાં હોટેલની બાલ્કનીમાં બેસીને ગરમ કૉર્ન સૂપ કે ફળફળતા પકોડા સાથે સમુદ્ર કિનારાને માણી શકીએ.

બાગા નોર્થ ગોવાનો એવો બીચ છે જ્યાં આપણે આપણી હોટેલથી ચાલીને બાગા બીચ જઈ શકીએ. રોમાંચક વૉટર સ્પોર્ટ્સ અને ખરબચડી રેતમાં રમત બક્ષતો આ બાગા બીચ મિત્રો સાથે મોન્સૂન માણવાનું પ્રવેશદ્વાર છે. ડોલ્ફિન સ્પોટિંગ ટૂર્સ અને પેરાસેલિંગ અને વિન્ડ સર્ફિંગ જેવી અનેક જળ રમતો ઑફર કરતો આ બીચ પણજીથી માત્ર ૩૦ કિ.મી.ના અંતરે ઘૂઘવે છે અને પ્રકૃતિપ્રેમીઓને ફેવરિટ હેન્ગઆઉટ્સ અને શોપોહોલિક્સને તિબેટન માર્કિટની ખરીદી પણ આપે છે.