G-20 : ભારતની યશસ્વી સફળતા દુનિયા ઝૂકતી હૈ, ઝૂકાને વાલા ચાહિયે

> વૈશ્વિક સ્તરે ભારતે ઇતિહાસમાં અંકિત કરેલી યશસ્વી ગાથા > ભારતે સર્વસંમતિથી દિલ્હી ઘોષણાપત્ર મંજૂર કરાવવામાં ગજબની કુનેહ દાખવી > ઇવેન્ટની ભવ્યતા, ભારતની મહેમાનગતિ, સલામતીની જડબેસલાક વ્યવસ્થાની નોંધ વિશ્વના નેતાઓ અને મીડિયાએ લીધી

- સુધીર એસ. રાવલ

શીર્ષકના લખાણને અહંકાર, મિથ્યાભિમાન કે એવા કોઈ નકારાત્મક અર્થમાં ન લેતાં વડાપ્રધાન નરેન્દ્ર મોદીના નેતૃત્વ હેઠળ વૈશ્વિક સ્તરે ભારતે ઇતિહાસમાં અંકિત કરેલી યશસ્વી ગાથામાં રહેલી સંકલ્પ શક્તિ, સ્વાભિમાન અને ઉન્નત મસ્તકે જગતના દેશોને ભારતના સામર્થ્યનો પરિચય કરાવતી G-20 શિખર સંમેલનની અસાધારણ સફળતાની માત્ર અલ્પ શબ્દોમાં સંતોષની અનુભૂતિ સાથેની ગૌરવભેર અભિવ્યક્તિ છે. જે સમયે દુનિયા મહાસત્તાઓની તાકાત, અહંકાર અને વર્ચસ્વની લડાઈ વચ્ચે અનેક રીતે વહેંચાયેલી હોય તેવા સમયે કોઈ વૈશ્વિક મંચ પર સમગ્ર માનવજાતના કલ્યાણ અને બહેતર ભવિષ્ય માટે એક સંકલ્પપત્ર પર સર્વસંમતિ પ્રાપ્ત કરવી, તે અત્યંત સુખદ્ સંકેત છે. આ શક્ય બનાવવામાં ભારતની, ખાસ કરીને વડાપ્રધાન નરેન્દ્ર મોદીની આંતરરાષ્ટ્રીય કક્ષાએ તેઓના વિદેશ મંત્રી એસ જયશંકર, વિદેશ મંત્રાલયના ચુનંદા સનદી અધિકારીઓ, વહીવટી તંત્ર તથા તજજ્ઞો સાથેની વર્ષભરની તનતોડ મહેનત રંગ લાવી છે. દૂરંદેશીપૂર્વકનું આયોજન, વૈશ્વિક સમીકરણોનો ગહન અભ્યાસ, સમસ્યાઓની વાસ્તવિકતાને લક્ષમાં રાખી ઉપાયો માટેના મજબૂત પ્રયાસો, સફળ અને સમયબદ્ધ અમલીકરણ સાથે ભારતીય સંસ્કૃતિની ‘વસુધૈવ કુટુમ્બકમ્'ની કલ્યાણ ભાવના જેવી ભારતની વિશિષ્ટતાઓ, એ આજ સુધીના G-20ના ઇતિહાસમાં અન્ય દેશો કરતાં વિશિષ્ટ સાબિત થઈ છે. સ્વાભાવિક જ છે કે જગતભરના દેશોએ તેની ખાસ નોંધ લીધી છે અને વૈશ્વિક ફલક પર ભારતનો અવાજ વધુ બુલંદ બન્યો છે.