નિસર્ગોપચારનું સ્વર્ગ, જિંદાલ નેચરક્ચર ઇન્સ્ટિટ્યૂટ

૫૫૦પથારીની આ નેચરોપથી હૉસ્પિટલમાં ૪૦ ટકા પથારી આર્થિક રીતે નબળા લોકો માટે રખાય છે. ડ્રગલેસ પ્રાકૃતિક ચિકિત્સા ઇચ્છતા સમૃદ્ધોનું આ સ્વર્ગ એક્સો એકરમાં છવાયેલું છે. અહીંના સમય પત્રકમાં ફુરસદનો સમય ઍરોબિક્સ, સ્વિમિંગ જેવી રિક્રિએશન પ્રવૃત્તિથી સભર છે.

- રક્ષા ભટ્ટ

આસો-કારતકના પર્વીય દિવસો સાથે જ શિયાળાનો હૂંફાળો પ્રવેશ આંગણામાં આળેખેલી રંગોળીના રંગ લઈ આપણી આસપાસ વીંટળાઈ જાય છે. લીલાં શાકભાજીથી સભર માર્કેટ, વહેલી સવારથી શહેરનાં ઉદ્યાનો અને રસ્તાઓ પર ચાલતાં અને દોડતાં શહેરીજનો, જ્યૂસ-સલાડ અને ઉકાળાથી અખંડ સવાર-બપોર-સાંજ અને યમ-નિયમ, યોગ અને પ્રાણાયામથી પ્રસન્ન આખો માહોલ હૃદય-મનની બંધ બારીઓને ખોલી આપણને એકદમ શુદ્ધ કરી જીવનની ગાડીમાં તાજું એન્જિન ઓઇલ પૂરવાનું કામ કરે છે.

શરીર-મનના આવા હાર્મોનિયસ લ્યુબ્રિકેશનમાં ભારતનું વૅલનેસ ટૂરિઝમ વિશ્વ કક્ષાએ અવ્વલ નંબરે આવે છે. નિસર્ગોપચાર, યોગ, આયુર્વેદ અને વૈદિક ઉપચારોની આ ભૂમિમાં વિશ્વ કક્ષાની હસ્તીઓ તનમનથી રિચાર્જ થવા ભારત આવે છે અને ખરા અર્થમાં રિચાર્જ થાય છે; હળવાફુલ અને તાજા-માજા થાય છે અને તદ્દન નવી ઊર્જાથી ફરી પોતાને કામે ચડે છે. આવા રિજૂવેનેટિંગ અનુભવમાં નેચરોપેથી એટલે કે નિસર્ગોપચારનો ફાળો અનેક ગણો છે. આ નિસર્ગોપચાર કોઈ જાતની શસ્ત્રક્રિયા અને દવાઓ વગરનો એવો ઉપચાર છે જે એવું કહે છે કે આપણી પ્રકૃતિમાં જ આપણા શરીરનાં દર્દ મટાડવાની અમાપ શક્તિ પડેલી હોય છે. શુદ્ધ હવા-પાણી, પ્રકાશ અને ભોજનથી આપણે જાતે જ આપણી સારવાર કરવા સક્ષમ છીએ. યોગ્ય આહાર-વિહારનો પાયો નાખી શરીર-મનની સ્વસ્થતાનું પ્રસન્ન ઘર બાંધતાં આવા નિસર્ગોપચાર ના અનેક ઉત્તમ સેન્ટર્સ ભારતના ‘વૅલનેસ' ડેસ્ટિનેશન્સ છે જેમાં જિંદાલ નેચરચૂર સંસ્થા વર્થ બિઇંગ એટની યાદીમાંનું એક છે.

‘ઇન્સ્ટિટ્યૂટ ઑફ નેચરોપેથી એન્ડ યોગિક સાયન્સીઝ’ના નામથી સુવિખ્યાત આ નિસર્ગોપચાર સંસ્થા બેંગ્લોર ઍરપોર્ટથી ઉત્તર-પશ્ચિમે ૨૭ કિ.મી. દૂર રહેલા જિંદાલ નગરમાં આવેલી છે. બેંગ્લોર રેલવે સ્ટેશનથી ૧૭ કિ.મી.ના અંતરે પાર્લે-જી બિસ્કિટ ફેક્ટરી આસપાસ લૉકેટ થયેલા આ વૅલનેસ સેન્ટરમાં ઑક્ટોબરથી ફેબ્રુઆરીની ખુશનુમા ઋતુમાં જવું હોય તો ત્રણેક મહિના અગાઉ ઓનલાઇન એડવાન્સ બુકિંગ કરાવી આપણે આપણા જીવનના એકાદ શિયાળાને એક લાંબી હગ આપી તદ્દન નવી નક્કોર ઊર્જાથી ભરી શકીએ છીએ.